Senat týrıstik qyzmetti yntalandyrýǵa baǵyttalǵan zańdy qabyldady
«Zań jobasynyń negizgi maqsaty - retteýshi quraldardy ońtaılandyrý, týrıstik salany memlekettik qoldaý sharalaryn aıqyndaý, sondaı-aq kóshpeli týrızmniń qyzmetin retteý arqyly ishki jáne kelý týrızmin damytýdy yntalandyrý boıynsha quqyqtyq jaǵdaılar jasaý. Zań jobasyn qabyldaý týrıstik saladaǵy memlekettik retteýdi odan ári jetildirýge, týrıstik qyzmet salasyndaǵy zańnamanyń sapasyn arttyrýǵa jáne ınvestıtsııalar tartý tetigi arqyly týrıstik salany damytýǵa múmkindik beredi. Zań jobasy boıynsha Senattyń turaqty komıtetterinen eskertýler men usynystar túsken joq», - dedi senator Dınar Nóketaeva atalǵan qujatty ekinshi oqylymda qaraý barasynda.
Senat tóraǵasy Máýlen Áshimbaevtyń aıtýynsha, búgin qabyldanǵan zań osy baǵytta keshendi zańnamalyq negiz qalyptastyratynyn aıtty.
«Elimizde týrızm salasyn damytý mańyzdy maqsattardyń biri. Búgin qabyldanǵan zań osy baǵytta keshendi zańnamalyq negiz qalyptastyrady. Soǵan sáıkes qarjylaı qoldaý tetikteriniń de aýqymy keńeıdi. Olardyń qatarynda ınvestıtsııalyq jeńildikter, týrıstik qyzmetti yntalandyrý, syrttan týrıster ákeletin týroperatorlardyń shyǵyndaryn sýbsıdııalaý sııaqty basymdyqtar bar», – M. Áshimbaev.
Aıta keteıik, búgin Senattyń jalpy otyrysynda atalǵan qujatty birinshi oqylymda talqylaý kezinde QR Mádenıet jáne sport mınıstri Aqtoty Raıymqulova elimizde basym týrıstik aýmaq uǵymy engiziletinin atap ótti.
«Basym týrıstik aýmaq - týrıstik kartanyń respýblıkalyq obektiler tizimine engizilgen, týrıstik damýdyń erekshe áleýeti bar aýmaq. Basym týrıstik aýmaq resýrstardy týrızmdi damytýdyń perspektıvaly núktelerinde shoǵyrlandyrý maqsatynda qurylady. Sondaı-aq, bul aýmaqta ınvestorlar úshin erekshe jeńildikter jáne qazaqstandyqtardyń elde demalýǵa baǵyttalǵan ilgeriletý sharalary qarastyrylǵan», - dedi mınıstr.
Sonymen qatar ol sheteldik týrısterge qatysty týrıstik alym júıesin engizý qarastyrylǵanyn atap ótti.
Týrızm salasyn memlekettik qoldaýdyń jańa sharalaryn engizýge baılanysty ýákiletti jáne basqa memlekettik organdarǵa tıisti qosymsha quzyretter beriledi:
- týrıstik nysandar men jol boıyndaǵy qyzmet kórsetý obektilerin salýǵa kásipkerlik sýbektileri shyǵyndarynyń bir bóligin óteý;
- týrıstik maqsattarǵa arnalǵan kólik quraldary men taý shańǵysy kýrorttaryn damytýǵa arnalǵan jabdyqtar alýǵa shyǵyndardyń bir bóligin óteý;
- týrıstik paket aıasynda árbir kelgen sheteldik týrıst úshin týroperatorlardy sýbsıdııalaý;
- týrıstik paket aıasynda balalarǵa arnalǵan ushý bıleti úshin tasymaldaý tólemin óteý.
Mınıstrlik málimetinshe, bul sharalardy júzege asyrý ekonomıkaǵa bıýdjettiń qosymsha kirisi túrinde 135 mlrd teńgeni tartýǵa, 170 myńnan astam jumys ornyn qurýǵa jáne kem degende 1000 jobany iske asyrýǵa múmkindik beredi.
