Senat turǵyn úı qatynastaryna arnalǵan zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylandy. Qujatqa birqatar túzetýler engizilgendikten, zań jobasy Májiliske qaıtaryldy.
Eske sala keteıik, zań jobasy boıynsha turǵyn úı qatynastary salasynda ákimshilik quqyq buzýshylyqtardyń jańa quramdary engiziledi. Memlekettik turǵyn úı alýǵa úmitker adamdardyń tobyn anyqtaı maqsatynda «bıýdjettik uıymdar» uǵymy engiziledi. Sonymen qatar, ýákiletti organdardyń turǵyn úıge qoıylatyn tehnıkalyq talaptary boıynsha quzyretin anyqtaý qarastyrylyp, kondomınıým nysanyn basqarý organdary qyzmetiniń ashyqtyǵyn qamtamasyz etý kózdeledi.
Toqtala ketetin jaıt, zań jobasynda kóp balaly otbasylardyń memlekettik turǵyn úı qorynan baspana alǵanǵa deıin olardyń kezegin saqtaý, Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beriletin jeńildikter men olardy áleýmettik qorǵaý, jetim balalardyń, ata-analarynyń qamqorlyǵynan aıyrylǵan balalardyń turǵyn úıge sózsiz quqyǵyn saqtaı otyryp, olardyń arasynda páterler bólý úshin eń kemi jıyrma paıyzdyq kvota bekitý týraly usynystar da qabyldanǵan.
Ekinshi oqylymda talqylaý barysynda senatorlar tarapynan birqatar túzetýler engizilgen bolatyn. Atap aıtqanda, joǵary palata depýtattary turǵyn úı qorynan muqtaj azamattardy esepke qoıǵan kezde oblystyq mańyzy bar qalalarda keminshe úsh jyl turaqty turý jónindegi talapty alyp tastaýdy usynady. Bul talap tek Almaty men Astana qalalarynda olardyń erekshe mártebesine oraı qaldyrý kózdeledi.
Sonymen qatar, senator Qýanysh Aıtahanov kóp balaly otbasylarǵa, úshemderdi dúnıege ákelgen ata-anaǵa baspanany kezeksiz berý týraly bastama kótergen bolatyn. Bul túzetýlerdi Úkimet ishinara ǵana qoldap, atalǵan sanattaǵy tulǵalardy baspanamen qamtý quqyǵyn jergilikti atqarýshy organdarǵa jergilikti bıýdjet esebinen qamtamasyz etýge berýdi usynǵan.
Jalpy, Senat Májilis maquldaǵan zań jobasyna on bes túzetý engizip, qujatty tómengi palataǵa qaıtardy.
