Senat Tramptyń memlekettik shyǵystardy qysqartý týraly zańyna daýys berdi

ASTANA. KAZINFORM – AQSh prezıdenti Donald Tramp ákimshiliginiń bastamasymen daıyndalǵan memlekettik shyǵystardy qysqartý týraly zań jobasyna AQSh Kongresiniń senatynda senbi kúni protsedýralyq daýys berý sharasy ótti, dep habarlaıdy TASS.

Qujatty 51 zań shyǵarýshy qoldady, 49 adam qarsy daýys berdi. Qorytyndy daýys berý jaqyn kúnderde ótedi. Kongrestiń eki palatasyn da baqylap otyrǵan respýblıkalyqtar osyǵan deıin zań jobasy 4 shildeden keshiktirilmeı maquldanady dep eseptep otyrǵandaryn málimdegen bolatyn.

Tramp «biregeı, aýqymdy, ádemi zań jobasy» dep ataǵan qujat birqatar salada salyq pen memlekettik shyǵystardy aıtarlyqtaı qysqartýdy qarastyrady. Bul rette ol qorǵanys salasyna, naqtyraq aıtqanda Golden Dome (Altyn kúmbez) zymyranǵa qarsy qorǵanys júıesine bólinetin qarjy kólemin arttyrýdy kózdep otyr.

Sonymen qatar qujatqa shekaralyq baqylaýdy qataıtýdy qarastyratyn sharalar kirgen, osy salaǵa da shyǵyndardy arttyrý qarastyrylǵan.

Osyǵan deıin Amerıka úkimetiniń jumys tıimdiligin arttyrý jónindegi vedomstvonyń úılestirýshisi bolǵan amerıkalyq kásipker Ilon Mask zań jobasyn birneshe ret synaǵan bolatyn. Bul rette kásipker qujattaǵy meleket qaryzynyń eń joǵary deńgeıin $5 trln-ǵa jetkizý týraly talapty synaǵan. Qazirgi tańda AQSh-tyń memlekettik qaryzy $36 trln.

Maýsym aıynyń basynda AQSh Kongresiniń bıýdjet basqarmasy baǵalaý qorytyndysyn jarııalady. Onda zań jobasynda qamtylǵan sharalardy júzege asyrý aldaǵy onjyldyqta AQSh-tyń bıýdjet defıtsıtin $2,4 trln arttyrýy múmkin ekeni kórsetilgen.

Atalǵan esep boıynsha, aldaǵy 10 jylda bıýdjettiń kirisi $3,6 trln-ǵa azaıady, al shyǵystar $1,2 trln-ǵa kemıdi.

22 mamyr kúni Kongrestiń tómengi palatasy atalǵan zań jobasyna qatysty ózderiniń nusqasyn maquldady.

Osyǵan deıin Qytaıdyń AQSh-pen saýda kelisimi jasalǵanyn rastaǵany týraly jazdyq.