Senat Tramptyń Aq úıdegi bal zalyna qarjy bólý týraly zań jobasyn qabyldamady
ASTANA. KAZINFORM — Respýblıkalyq partııa usynǵan Aq úıdegi bal zalyn qarjylandyrý úshin Qupııa qyzmetke 1 mlrd dollar bólý týraly zań jobasy qaıta pysyqtaýdy qajet etedi. Bul týraly Kazinform agenttiginiń Vashıngtondaǵy menshikti tilshisi NBC News-ke silteme jasap habarlady.
Zań jobasyna Senattyń Zań komıteti men Іshki qaýipsizdik jáne úkimet isteri jónindegi komıtetiniń bastamalary engizilgen. Alaıda demokrattar Donald Tramp usynǵan aýqymdy bal zaly jobasy Senattyń túrli komıtetteriniń quzyretine kiretin kóptegen memlekettik vedomstvolardyń úılestirilgen jumysyn talap etedi dep sanaıdy.
Sonymen qatar keıbir demokrattar «amerıkalyq halyq bul jobaǵa bir tsent te jumsamaýy kerek» degen pikir bildirdi.
— Respýblıkashyldar Tramptyń kóńilinen shyǵý úshin bul zań jobasyna ózgerister engizedi dep kútemiz. Biraq demokrattar kez kelgen túzetýge qarsy shyǵýǵa daıyn. Respýblıkashyldardyń ulttyq baılyǵymyzdy beıbereket pen jemqorlyqqa jumsap, amerıkalyqtardyń qajettilikterin elemeýine jol bere almaımyz, — dedi Senattyń Bıýdjet komıtetiniń múshesi, Oregon shtatynan saılanǵan demokrat senator Djeff Merklı.
Respýblıkashyldar kelesi shyǵyndardy usyndy: Aq úı keshenin kúsheıtýge — 220 mln dollar, kelýshilerdi tekserý pýnktine — 180 mln dollar, qyzmetkerlerdi oqytýǵa — 175 mln dollar jáne Qupııa qyzmet qorǵaýyndaǵy tulǵalardyń qaýipsizdigin kúsheıtýge taǵy 175 mln dollar bólý.
Kentýkkı shtatynan saılanǵan respýblıkashyl senator Rend Pol men Men shtatynan saılanǵan respýblıkashyl senator Sıýzan Kollınz bul joba Tramp ýáde etkendeı jeke qarjy kózderi arqyly qarjylandyrylýy tıis ekenin aıtty.
Buǵan deıin Nıý-Iorktegi halyqaralyq saýda máseleleri jónindegi federaldyq sot AQSh prezıdenti Donald Tramp engizgen 10 paıyzdyq ımporttyq baj salyǵyn zańsyz dep tanydy.
