Senat tóraǵasynyń orynbasary ınvestıtsııalyq kelisimsharttardy synǵa aldy

ASTANA. QazAqparat – Senat tóraǵasynyń orynbasary Olga Perepechına ekonomıkanyń ımportqa táýeldiligine qatysty pikir bildirdi, dep habarlaıdy QazAqparat tilshisi.

«Statıstıka málimetine toqtalsaq, elimizde bekitilgen ınvestıtsııalyq kelisimsharttar kóp. 2017-2022 jyldar aralyǵynda 3,4 trln teńge somaǵa 351 ınvestıtsııalyq kelisimshart jasalǵan. Onyń ishinde 2,5 trln teńge shamasynda júzege asyrylyp jatqan 238 shart bar. Kelisimsharttar kóp, al ekonomıkamyzdyń qurylymy ımportqa táýeldi bolyp qalyp otyr», - dedi O. Perepechına Senatta Qazaqstannyń ınvestıtsııalyq ahýaly tartymdylyǵy taqyrybynda ótip jatqan Úkimet saǵatynda.

Onyń aıtýynsha, Qazaqstan eń mańyzdy qurylys materıaldarynyń ımportyna 90 paıyzǵa táýeldi. Sonymen qatar, bıýdjetten qomaqty qarjat bólinip, agroónerkásip keshenine salyq jáne kedendik preferentsııalar berilgenine qaramastan, áleýmettik mańyzy bar azyq-túlik taýarlardyń 56%-ǵa deıin kólemin ımporttaımyz.

«Arnaıy ekonomıkalyq aımaqtarǵa toqtalsaq, AEA-lar aýmaǵynda ónerkásiptik kásiporyndardy qurýǵa salynǵan ınvestıtsııanyń jalpy somasy 1,2 trln teńge boldy, onyń 65%-dan astamy kvazımemlekettik sektor sýbektileriniń qatysýymen. Bul turǵyda jeke ınvestıtsııany memlekettik ınvestıtsııamen naqty almastyrý bolǵany baıqalyp otyr. Osy saladaǵy jaǵdaı ónerkásipke jeke ınvestıtsııalardy tartý deńgeıiniń tómendigin, sondaı-aq arnaıy ekonomıkalyq aımaqtardyń eksport boıynsha baǵdarynyń nashar ekenin kórsetip otyr», - dedi Senat tóraǵasynyń orynbasary.

Onyń sózine qaraǵanda, AEA-ǵa ınvestıtsııalardy tartýǵa kedergi keltiretin negizgi problema ınfraqurylymnyń tolyq salynbaýyna, myqty kadrlardyń tapshylyǵy jáne basqa da máselege qatysty.

Budan buryn habarlanǵandaı, Qazaqstanda sheteldik ınvestıtsııanyń basym bóligi shıkizat sektoryna baǵyttalyp jatyr.