Senat tóraǵasynyń orynbasary Asqar Shákirov PRI ókildiginiń aımaqtyq dırektorymen kezdesti

NUR-SULTAN. QazAqparat - Parlament Senaty tóraǵasynyń orynbasary Asqar Shákirov «Penal Reform International» uıymy Ortalyq Azııadaǵy ókildiginiń aımaqtyq dırektory Azamat Shambılovpen kezdesti, dep habarlaıdy QazAqparat Senattyń baspasóz qyzmetine silteme jasap.

Kezdesý barysynda Qazaqstannyń osy halyqaralyq uıymmen yntymaqtastyǵynyń tıimdiligi atap ótildi.

Senat tóraǵasynyń orynbasary «Penal Reform International» Qazaqstandaǵy qylmystyq-atqarý júıesin reformalaýǵa, penıtentsıarlyq organdar qyzmetkerlerin kásibı daıarlaý men probatsııa qyzmetin damytýǵa, sottalǵandardy áleýmetke qaıta tartý men jazany oryndaýdaǵy úzdik tájirıbelermen tanysýǵa belsendi qatysyp kele jatqanyn atap ótti.

PRI ókildigi sondaı-aq Qazaqstanda aldyn alý jónindegi ulttyq tetikterdi qurý men qalyptastyrýda, onyń zańnamalyq bekitilýi men júzege asyrýda basty qatysýshylardyń biri bolyp tabylatyny atap ótildi. Qazirgi ýaqytta Qazaqstandaǵy aldyn alý jónindegi ulttyq tetikter memlekettik organdardyń azamattyq qoǵammen ózara is-qımylynyń úlgisi ári jabyq mekemelerdi qoǵamdyq baqylaýdyń pármendi ádisteriniń biri bolyp tabylady.

A.Shambılov Qazaqstandaǵy qylmystyq sot isin júrgizý men quqyq qorǵaý qyzmetin jetildirýge baǵyttalǵan reformalardy joǵary baǵalady. Onyń pikirinshe, elimizde keıingi kezde qabyldanǵan zańdar osy reformalardy iske asyrý úshin quqyqtyq bazany qurap otyr.

Taraptar kezdesý sońynda nátıjeli yntymaqtastyqty, onyń ishinde zań shyǵarý salasyndaǵy baılanystardy óristetý qajettigin aıtty