Senat Tóraǵasy: Joldaýdyń túp negizi – memlekettilikti nyǵaıtý, táýelsizdikti tuǵyrly etý
«Sonymen qatar, Joldaýda azamattardyń el isine aralasýyn kúsheıtetin bastamalar aıtyldy. Memlekettik bıliktiń birden-bir bastaýy – halyq. Konstıtýtsııanyń osy normasyn saıası praktıkada júzege asyratyn ýaqyt keldi. Kez kelgen demokratııalyq qoǵamda halyqtyń talap-tilegi – bıliktiń negizgi basymdyǵy. Árbir azamat bılik ókilderine ótinishterin jetkize alatynyna, olarǵa qulaq asatynyna senimdi bolýǵa tıis. Prezıdentimiz Joldaýda osyndaı irgeli qaǵıdalardyń nyǵaıýyn qamtamasyz etetin sheshýshi bastamalardy qolǵa alyp otyr. Basqa da kóptegen usynystar keshe jarııalandy», - dedi Senat Tóraǵasy.
Osy rette Máýlen Áshimbaev Parlamentti úlken ári jaýapty jumystar kútip turǵandyǵyn basa aıtty.
«Joldaýdyń aıasynda Ata Zańymyzdyń 30-dan astam babyna ózgeris engizemiz. Taǵy 20-dan astam zań qabyldanady. Biraq, Joldaýdy iske asyrý tek bılik tarmaqtarynyń mindeti ǵana emes. Bul – ortaq múdde, kóp bolyp jumylatyn is. Eldik iste zııaly qaýymnyń da alatyn orny erekshe. Joldaýdyń túp negizi – memlekettilikti nyǵaıtý, táýelsizdikti tuǵyrly etý. Qańtar oqıǵasy memlekettilik ózdiginen qalyptaspaıtynyn, ol úshin árdaıym kúresý qajet ekenin aıqyn kórsetti. Az ǵana kúnniń ishinde eldigimizden aıyrylyp qala jazdadyq. Qaı zamanda da qazaqtyń zııalysy eldik pen egemendikti qorǵaýdy óziniń qasıetti paryzy sanaǵan. Qazirgi kezeńde osy mindet eselenip otyr desek, artyq aıtqandyq emes. Zııaly qaýymnyń memlekettilikti bekemdeýge úndeıtin qaıratkerlik kúshi osy tusta asa qajet», - dedi ol.
