Senat tóraǵasy zań shyǵarý protsesindegi kemshilikterdi atady
ASTANA. QazAqparat - Elimizdiń birqatar zańdardan ishki qarama-qaıshylyqpen qatar teńgerimdiliktiń joqtyǵyn kórýge bolady. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda joǵary palata spıkeri Qasym-Jomart Toqaev aıtty, dep habarlaıdy QazAqparat tilshisi.
«Parlamenttiń ókilettigin kúsheıtý jumysy zań shyǵarýshy tulǵalardyń zań jobalaryn ázirleý jáne olarǵa bastamashylyq jasaý tártibin retteýdi talap etedi. Osy jerde birinshi másele týyndaıdy. Bul - áli kúnge deıin ózgerissiz qalyp otyrǵan zań jobalaý jumysyn josparlaý deńgeıiniń tómendigi, ol zań shyǵarý jumysyndaǵy júıesizdikke, «shashyrańqylyqqa», ábden pisip-jetilgen túıtkilderdiń tym kesh sheshilýine jáne kodıfıkatsııalanǵan aktilerdiń retsiz túzetilýine ákelip soǵady», - dedi Qasym-Jomart Toqaev.
Onyń aıtýynsha, sondyqtan zań normalary quqyqtyq ahýal jasaýdyń ornyna, tez ózgerip otyratyn qubylmaly jaǵdaılardyń saldary bolyp tabylady. Parlament qabyldaǵan zańnamalyq aktilerge kúshine engen kezden bastap bir jyl ishinde basqa zańdar negizinde júzge jýyq ózgertýler engiziletin jaǵdaılar da kezdesedi.
«Kóp jaǵdaılarda bizdiń zańdarymyz ekonomıka men qoǵam ómirindegi shuǵyl problemalardy sheshýge baǵyttalady. Sonyń saldarynan bul zańdardyń mazmunynda aǵymdaǵy jaǵdaıǵa degen tujyrymdamalyq kózqaras pen memlekettiń damýyna oń yqpal etetin úrdisterdiń tapshy ekeni birden baıqalady. Birqatar zańdardan ishki qarama-qaıshylyqpen qatar teńgerimdiliktiń joqtyǵyn kórýge bolady. Zań bir uǵymnyń ózin alýan túrli maǵynada túsindirýi múmkin. Bul jaǵdaı qoǵamnyń Parlament pen Úkimettiń qyzmetine degen synı kózqarasyn týǵyzary anyq», - dedi ol.
Senat spıkeri elimizdiń zańnamalyq júıesindegi mańyzdy mindetterdiń biri Qazaqstandy damyǵan 30 eldiń qataryna engizýdi quqyqtyq qamtamasyz etý ekendigine de nazar aýdartty.
«Osy oraıda, Úkimettiń joǵary reıtıngtik kórsetkishterge saı bolýǵa baǵyttalǵan tereń umtylysyn atap ótý qajet. Árbir memlekettik organ óz mindetterine ǵana sáıkes keletin qaǵıdattar men ádister negizinde halyqaralyq reıtıngterge qol jetkizý mindetin qoıdy. Sonymen qatar, aldyńǵy qatarly damyǵan elderdiń tobyna kirý sharalary Úkimettiń barlyq organdarynyń osy baǵyttaǵy úılesimdi jumysyn qajet etedi. Halyqaralyq uıymdarmen is-qımyl jasaýdyń mańyzy zor ekeni kúmánsiz, biraq olardyń talaptary men suranystary, eń aldymen, ulttyq múddelerdi qamtamasyz etýge jáne Qazaqstan azamattarynyń muń-muqtajdary men qajettilikterin qanaǵattandyrýǵa baǵyttalǵan zań shyǵarý jumysyna tosqaýyl bolmaýy tıis», - dedi.
Q.Toqaevtyń paıymynsha, atalǵan protsesti anaǵurlym keshendi, úılesimdi jáne ony halyqaralyq qoǵamdastyqpen qatar elimizdiń azamattarynaa uǵynyqty etý úshin onyń kezeńderi men sharttaryn quqyqtyq retteý máselesin qaraýymyz qajet.
