Senat tóraǵasy: Ulttyq kitaphana men Ulttyq muraǵat -halqymyzdyń qundylyqtary
ASTANA. QazAqparat - Senat tóraǵasy Qasym-Jomart Toqaev Ulttyq akademııalyq kitaphanada jáne Ulttyq sırek kitaptar men qoljazbalar ortalyǵy ázirlegen «Uly Jibek jolyndaǵy kitap basý» kórmesinde boldy.
Senat baspasóz qyzmetiniń habarlaýynsha, Parlament joǵarǵy Palatasynyń basshysy kitaphanada bolǵan kezde qazaq jazýy men kitap shyǵarý tarıhyn beıneleıtin kitap kórmesimen jáne kitap qorymen, oqyrman zaldarynyń jabdyqtalýymen tanysty. 
Senat tóraǵasyna Abaı Qunanbaevtyń, Ahmet Baıtursynovtyń, Ybyraı Altynsarınniń, Shoqan Ýálıhanovtyń sırek basylymdary men qoljazbalary, orta ǵasyrdaǵy qalyń kitaptar men geografııalyq kartalar kórsetildi. Q. Toqaev qoıylǵan jádigerlerdiń mádenı aǵartý men ony halyqtyń jadyna saqtaýdaǵy tarıhı mańyzdylyǵyn atap ótti.
Sondaı-aq Senat basshysy kórmeni aralaý barysynda Uly Jibek joly boıynda ómir súrgen halyq ómirin, tarıhy men geografııalyq jaǵdaılardy pash etetin, túrli kezeńde jaryq kórgen kitaptarmen de tanysty. Mundaǵy kóptegen jádigerlerdiń dúnıe júzinde basqa nusqasy kezdespeıdi.
«Ulttyq kitaphana men Ulttyq muraǵat bizdiń elimizdiń, bizdiń halqymyzdyń qundylyqtary bolyp tabylady. Munda óte qundy dúnıeler bar. Bul bizdiń elimizge óte qajet jumys. Elbasy osy salaǵa basa nazar aýdaryp keledi», - dedi Senat basshysy. Sondyqtan Parlament pen Úkimet tarapynan mádenı-aǵartý salasyn damytýǵa erekshe mán beriledi, - dep atap ótti Q. Toqaev.
