Senat tóraǵasy ulttyq qarjy júıesiniń ashyqtyǵyn arttyrýǵa qatysty pikir bildirdi
NUR-SULTAN. QazAqparat - Qylmystyq jolmen alynǵan kiristerdi jylystatýǵa qarsy is-qımyl máseleleri týraly zań ulttyq qarjy júıesiniń ashyqtyǵyn arttyrýdy kózdeıdi. Bul týraly Senat tóraǵasy Máýlen Áshimbaev málim etti, dep habarlaıdy QazAqparat tilshisi.
«Qylmystyq jolmen alynǵan kiristerdi zańdastyrý jáne terrorızmdi qarjylandyrý qoǵam men memleket úshin qaýip týdyratyny anyq. Sol sebepti, osy qylmystarǵa qarsy is-qımyldardyń tıimdiligin arttyrý jáne bul saladaǵy syn-qaterlerdiń aldyn alý asa mańyzdy. Sondyqtan búgin qabyldanǵan zań qylmystyq kiristerdi azaıtýdy jáne ulttyq qarjy júıesiniń ashyqtyǵyn arttyrýdy kózdeıdi», – dedi Máýlen Áshimbaev Senattyń jalpy otyrysynda.
Aıta keteıik, Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» Zańy qabyldandy.
Zańǵa sáıkes endi jarııa laýazymdy tulǵalardyń qarjy operatsııalaryna zańnamalyq turǵyda baqylaý júrgiziledi. Buryn olar qarjylyq monıtorıng sýbektileriniń qataryna qosylmaǵan edi. Jańa norma boıynsha budan bylaı salalyq Agenttik ulttyq jarııa laýazymdy tulǵalardyń tizimin júrgizedi.
