Senat tóraǵasy: Úkimet quqyq qoldaný máselelerine erekshe nazar aýdarýy qajet
ASTANA. QazAqparat - Úkimet quqyq qoldaný máselelerine erekshe nazar aýdarýy qajet. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda joǵary palata spıkeri Qasym-Jomart Toqaev aıtty, dep habarlaıdy QazAqparat tilshisi.
«Memleketimizdiń qazirgi damý jaǵdaıynda joǵary sapaly zańdar júıesin qamtamasyz etý aıryqsha mańyzǵa ıe. Olardyń tıimdiligi zań shyǵarmashylyǵy protsesiniń barlyq tustaryn jan-jaqty oılastyrýmen tikeleı baılanysty ekeni túsinikti. Zań shyǵarý protsesin jete baǵalamaý nemese ony ońaılatý kóptegen zańnamalyq jáne quqyq qoldanýdaǵy qatelikterge alyp keletini sózsiz», - dedi ol.
Qasym-Jomart Toqaev Memleket basshysy óziniń «Qazaqstannyń úshinshi jańǵyrýy: jahandyq básekege qabilettilik» atty Joldaýynda tsıfrlyq ındýstrııany damytý basqa salalardyń órken jaıýyna erekshe serpin beretinin atap kórsetkenin eske saldy.
«Aldyńǵy qatarly tehnologııalar men ázirlemelerdi zań shyǵarý protsesinde paıdalaný zańnamalyq protsestiń sapasyna oń yqpalyn tıgizetini anyq», - dedi ol.
Osy rette Q.Toqaev Úkimet quqyq qoldaný máselelerine erekshe nazar aýdarýy qajettigin eskertti.
«Zańdardyń durys oryndalmaýy nemese burmalanýy olardyń sapasyn joqqa shyǵarady jáne halyqtyń senim deńgeıine aıtarlyqtaı keri áserin tıgizedi, sáıkesinshe bul memleketimizdiń reformalary men ornyqty damý strategııasyn oıdaǵydaı júzege asyrý barysyna aıtarlyqtaı teris yqpal etýi múmkin»,- dedi Senat spıkeri.
