Senat Tóraǵasy Túrkimenstan Prezıdentimen kezdesti
ASTANA. 10 mamyr. QazAqparat - QR Parlamenti Senatynyń Tóraǵasy Qaırat Mámı Qazaqstanǵa memlekettik saparmen kelgen Túrkimenstan Prezıdenti Gýrbangýly Berdimuhamedovpen kezdesti.
Bul týraly Senattyń baspasóz qyzmetinen habarlandy.
Kezdesý barysynda eki el arasyndaǵy parlamentaralyq baılanystardy damytýǵa basa nazar aýdaryldy. Máselen, Qazaqstan Parlamenti Senatynda Túrkimenstan Parlamentimen yntymaqtastyq toby qyzmet etedi. Júzdesýge osy toptyń músheleri de qatysty.
Taraptar parlamentaralyq ózara is-qımyl yntymaqtastyqtyń mańyzdy baǵyty ekenin atap ótti. Saýda-ekonomıkalyq, kólik-tranzıttik jáne basqa da salalardaǵy birlesken jobalardy zańnamalyq turǵyda odan ári qamtamasyz etýdiń qajettiligi aıtyldy.
G.Berdimuhamedov zań shyǵarý jumystarynyń jáne parlamentshiler arasyndaǵy tájirıbe almasýdyń mańyzdylyǵyn atap ótip, Túrkimenstan Májilisi Tóraıymynyń atynan Q.Mámıdi Ashgabadqa saparmen kelýge shaqyrdy.
Kezdesý barysynda Q.Mámı Túrkimenstan Prezıdentine Qazaqstan Parlamentiniń qurylymy, ókileti men qyzmeti jáne zań shyǵarý protsesteri týraly aıtyp berdi.
Senat Tóraǵasy Túrkimenstan basshysynyń memlekettik sapary Qazaqstan men Túrikmenstannyń yntymaqtastyǵyn odan ári damytýǵa jańa serpin beretinine senim bildirip, mártebeli meımanǵa saparynyń sátti bolýyna tilektestigin jetkizdi.
