Senat tóraǵasy Slovakııanyń Syrtqy jáne Eýropa isteri mınıstrimen kezdesti
Kezdesý barysynda Palata Spıkeri parlamentaralyq baılanysty belsendi túrde damytýdyń mańyzyna toqtalyp ótti.
«Qazaqstan Parlamentiniń Senaty Slovakııa Ulttyq keńesimen yntymaqtastyqty odan ári nyǵaıtýǵa múddeli. Bizdiń Parlamentimizdiń eki Palatasynda da Slovakııamen yntymaqtastyq jónindegi toptar jumys isteıdi. Sol sııaqty Slovakııanyń Ulttyq keńesinde Qazaqstanmen dostyq toby bar ekenin bilemiz. Sondyqtan aldaǵy ýaqytta bizder onlaın nemese oflaın rejımde birlesken is-sharalar uıymdastyra alamyz dep esepteımin. Mundaı qadam bizdiń ekijaqty ózara tıimdi is-qımylymyzǵa tyń serpin beredi dep senemin», – dedi Máýlen Áshimbaev.
Sonymen qatar Senat Spıkeri qazaqstandyq depýtattardyń slovakııalyq áriptesterimen halyqaralyq alańdardaǵy, onyń ishinde EQYU Parlamenttik Assambleıasy men Parlamentaralyq Odaq aıasyndaǵy ózara is-qımyl deńgeıine joǵary baǵa berdi.
Sondaı-aq kezdesýde taraptar ekonomıka, saýda, aýyl sharýashylyǵy, týrızm jáne sý resýrstary salalary boıynsha yntymaqtastyq máselelerin talqylady.
Máýlen Áshimbaev Slovakııanyń sý resýrstary salasy boıynsha óńirlik jáne halyqaralyq jobalardy iske asyrýda tájirıbesi mol ekenine nazar aýdaryp, Qazaqstan osy baǵytta birlesip jumys isteýge basa mán berip otyrǵanyn aıtty.