Senat tóraǵasy sessııa jumysyn qorytyndylady
«Búgin biz Palatanyń ekinshi sessııadaǵy jumysyn aıaqtap, qorytyndy otyrysymyzdy ótkizdik. Bul parlamenttik maýsymda biz mańyzy zor tarıhı ózgerister men irgeli isterdiń kýási boldyq. Sessııa barysynda Táýelsizdigimizdiń 30 jyldyǵyn búkil el bolyp atap óttik. Sondaı-aq, jyl basynda buryn-sońdy bolmaǵan jańa syn-qaterlermen betpe-bet keldik. Qasiretti qańtar oqıǵasy, álemdik geosaıası ahýal memlekettik basqarý júıesinde jańa tásilder men sheshimderdi talap etti. Osyǵan qaraı Memleket basshysy keshendi reformalar toptamasyn jarııalady. Sol arqyly zań shyǵarý qyzmetiniń de basym baǵyttaryn belgilep berdi», - dedi M. Áshimbaev Senattyń jalpy otyrysynda.
Osy oraıda ol túbegeıli saıası ózgerister qolǵa alynyp, konstıtýtsııalyq reforma júrgizilgenin aıtty. Respýblıkalyq referendým kezinde halyqtyń basym bóligi Ata Zańǵa usynylǵan túzetýlerge jáne Prezıdentimizdiń bastamalaryna qoldaý bildirdi.
«Osylaısha, ádiletti Jańa Qazaqstan qurýdyń berik negizi qalandy. Shyn máninde, elimiz áleýmettik-ekonomıkalyq jáne saıası damýdyń jańa kezeńine qadam basty .Konstıtýtsııaǵa engizilgen túzetýlerge sáıkes Parlamenttiń mártebesi artty. Azamattardyń quqyǵyn qorǵaý tásilderi jetilip, halyqtyń el basqarý isine qatysý múmkindigi keńeıdi. Bul ózgerister jańarýdyń basy ǵana. Saıası júıemizdi reformalaý odan ári jalǵasa beretini sózsiz. Bul jóninde Prezıdentimiz naqty aıtty. Osy baǵytta Parlament birqatar jańa zań qabyldap, qoldanystaǵy zańnamaǵa túzetýler engizýge tıis. Jańa sessııada osy jumysty belsendi túrde júrgizemiz», - dedi Senat tóraǵasy.
Onyń sózine qaraǵanda, Parlament ekinshi sessııada Úkimetpen birlese otyryp, 78 zań qabyldady.
«Olar Prezıdentimizdiń tapsyrmalaryn, ulttyq jobalar men memlekettik baǵdarlamalardy iske asyrýǵa arnaldy. Zań shyǵarý isinde adam quqyǵyn qorǵaý, azamattardy áleýmettik jaǵynan qamtamasyz etý máselesine basa mán berildi. Memlekettik basqarý júıesin jetildirýdi, ekonomıkamyzdy odan ári damytýdy jáne elimizdiń qaýipsizdigin kúsheıtýdi kózdeıtin zańdar qabyldandy. Sessııa barysynda azamattardyń ál-aýqatyn arttyrýǵa arnalǵan keshendi is-sharalar men qoǵamdyq-saıası bastamalardy zańnamalyq turǵydan ýaqtyly qamtamasyz etýge basa mán berildi. Qoǵamdaǵy áleýmettik teńsizdikti joıýǵa, erekshe qajettiligi bar azamattardy jan-jaqty qoldaýǵa arnalǵan normalar qabyldandy. Osyǵan qaraı senatorlar Memleket basshysynyń tapsyrmalaryn oryndaý maqsatymen zańǵa bastamashyldyq etý quqyǵyn keńinen paıdalandy. Birinshi sessııada Senat depýtattary 7 zańǵa bastamashy bolsa, bul sessııada 18 zań jobasy boıynsha bastamashyldyq jasady. Aldaǵy ýaqytta da osy qarqyndy saqtaımyz dep senemin», - dedi M. Áshimbaev.
Sessııa barysynda 2 parlamenttik tyńdaý jáne 4 Úkimet saǵaty ótkizildi. Onda aýyl sharýashylyǵyn damytý, jastar saıasaty, bıýdjetaralyq qatynasty jetildirý, syrtqy jáne ishki saýda, óndiristik qaýipsizdik, óńirlerdi gazdandyrý sııaqty ózekti máseleler kóterildi.
Senatta 30-ǵa jýyq dóńgelek ústel ótti. Turaqty komıtetter aımaqtarda 10-nan astam kóshpeli otyrys uıymdastyrdy.
«Áriptesterimiz óńirlerde, onyń ishinde shalǵaı aýyldarda jergilikti turǵyndarmen 500-den astam kezdesý ótkizdi», - dedi ol.
