Senat Tóraǵasy Saýd Arabııasynyń elshisimen kezdesti
Taraptar kezdesý barysynda eki eldiń yntymaqtastyǵy men parlamentaralyq baılanystar boıynsha ózara is-qımyly máselelerin talqylady.
Senat spıkeri Saýd Arabııasy Qazaqstannyń Taıaý Shyǵystaǵy mańyzdy seriktesiniń biri ekenin aıtty.
«Qazaqstannyń Tuńǵysh Prezıdenti – Elbasy Nursultan Nazarbaevtyń kúsh-jigeriniń arqasynda bizdiń elderimiz arasynda ózara qurmet pen senimge negizdelgen saýda-ekonomıkalyq, mádenı jáne saıası baılanystar qalyptasty. Qazirgi tańda Memleket basshysy Qazaqstan pen Saýd Arabııasynyń arasyndaǵy kóp qyrly yntymaqtastyqty odan ári nyǵaıtýǵa basa nazar aýdaryp otyr», – dedi Máýlen Áshimbaev.
Palata Tóraǵasy ózara parlamentaralyq dıalogty odan ári damytýǵa da barlyq múmkindikter bar ekenine nazar aýdardy. Ol sondaı-aq Qazaqstanda ótkizilip kele jatqan Álemdik jáne dástúrli dinder lıderleriniń sezine Saýd Arabııasynyń ókilderi belsendi qatysqany úshin
júzdesýshige alǵys aıtty jáne pandemııadan keıingi kezeńde memleketaralyq yntymaqtastyqqa qarqyn berý qajettigin atap ótti.
«Bizdiń elderimizdi tarıhı, rýhanı jáne mádenı tyǵyz baılanystar jaqyndastyrady. Saýd Arabııasynyń ekonomıkalyq damýy bizdiń kóz aldymyzda. Ekonomıkany ártaraptandyrýǵa, densaýlyq saqtaýdy, bilim berýdi, ınfraqurylymdy jáne týrızmdi damytýǵa baǵyttalǵan «Saudi vision 2030» baǵdarlamasyn jeke atap ótkim keledi. Biz uqsas máselelerdi sheship kelemiz. Bizdiń elderimizdegi ekonomıkalyq reformalardyń kóptegen aspektileri men baǵyttary da uqsaıdy, óıtkeni onyń basty maqsaty – bizdiń memleketimizdegi halyqtardyń ál-aýqatyn arttyrý bolyp tabylady», – dedi Máýlen Áshimbaev.
Sonymen qatar Senat Tóraǵasy «G-20» uıymyna tabysty tóraǵalyq etýine oraı Saýd Arabııasynyń Úkimetine quttyqtaýyn jetkizdi.
