Senat tóraǵasy Saýd Arabııasy Koroldiginiń Elshisimen kezdesti

ASTANA. QazAqparat – Senat tóraǵasy Máýlen Áshimbaev Saýd Arabııasy Koroldiginiń Qazaqstandaǵy Tótenshe jáne Ókiletti Elshisi Faısal ben Hanıf ál-Kahtanımen kezdesti. Suhbat barysynda ekijaqty yntymaqtastyqty arttyrý máseleleri talqylandy, dep habarlaıdy QazAqparat Palatanyń baspasóz qyzmetine silteme jasap.

Máýlen Áshimbaev Saýd Arabııasy Koroldigi Qazaqstannyń Taıaý Shyǵystaǵy jaqyn seriktesi ekenin jáne eki el arasynda jan-jaqty yntymaqtastyq ornaǵanyn aıtty. Palata tóraǵasy atap ótkendeı, ózara baılanystyń damýyna joǵary deńgeıdegi júıeli saıası dıalog negiz bolyp otyr.

Byltyr Qazaqstan Prezıdenti Qasym-Jomart Toqaevtyń Djıddaǵa jasaǵan sapary memleketter arasyndaǵy qarym-qatynasqa aıtarlyqtaı serpin berdi. Sol kezde sapardyń qorytyndysy boıynsha týrızm, sport, aýyl sharýashylyǵy, farmatsevtıka jáne basqa da salalardy qamtıtyn ekijaqty 13 qujatqa qol qoıylǵan bolatyn.

Máýlen Áshimbaev Qazaqstan Parlamenti Senaty men Saýd Arabııasy ash-Shýrasy Medjlısi arasyndaǵy yntymaqtastyqty nyǵaıtýdyń mańyzyna da toqtaldy. Sondaı-aq, Memleket basshysynyń bastamasymen elimizde qolǵa alynǵan keshendi reformalardyń iske asyrylý barysyna nazar aýdardy.

Sonymen qatar, Senat spıkeri Álemdik jáne dástúrli dinder lıderleri Seziniń qyzmeti týraly aıtyp, Koroldiktiń din kóshbasshylaryn bıyl kúzde ótetin Sezd Hatshylyǵynyń mereıtoılyq otyrysyna qatysýǵa shaqyrdy.