Senat Tóraǵasy Sankt-Peterbýrgte TMD Parlamentaralyq Assambleıasynyń sharalaryna qatysty
TMD PAA Keńesiniń otyrysy men Parlamentaralyq Assambleıanyń 48-shi otyrysynda uıymǵa qatysýshy memleketter parlamentteriniń basshylary jıyrmadan astam mańyzdy máselelerdi talqylady. Kún tártibine «Órtten erikti qorǵaý týraly», «Derbes derekter týraly» sekildi mańyzy zor úlgi zań jobalary engizilip, 2019 jyldyń alǵashqy jarty jyldyǵyndaǵy TMD elderindegi memlekettik bılik organdarynyń saılaýlaryn baıqaýǵa ázirlik máseleleri qaraldy jáne TMD PAA-nyń 2019 jylǵa jumys jospary bekitildi.
Senat depýtattary sondaı-aq TMD PAA janyndaǵy qaýipsizdik jáne jańa qaterler men qaýipterge qarsy is-qımyl jónindegi zańnamany úılestirý jónindegi birlesken komıssııalardyń, TMD PAA Qorǵanys jáne qaýipsizdik; Saıası máseleler jáne halyqaralyq yntymaqtastyq; Quqyqtyq máseleler jónindegi turaqty komıssııalardyń otyrystaryna qatysty.
Tavrııa saraıynda parlamentshilerdiń qatysýymen Shyńǵys Aıtmatovtyń týǵanyna 90 jyl tolýyna arnap qoıylǵan kórme ashyldy.
TMD PAA Keńesiniń qorytyndylary boıynsha ótken baspasóz máslıhatynda Senat basshysy qytaılyq «Bir beldeý, bir jol» jobasyn iske asyrýǵa TMD elderiniń qatysý múmkindigi týraly pikirimen bólisti. Onyń aıtýynsha, álemdegi ekonomıka men halyqaralyq ahýaldaǵy shıelenister, sanktsııalyq teke-tirester, alpaýyt elder arasyndaǵy saýda qaıshylyqtarynyń arta túsýi aıasynda qytaılyq strategııanyń mán-mańyzy arta túsetin bolady. «TMD elderiniń bul jobaǵa belsendi qatysýy Eýrazııadaǵy yqpaldastyq úderisterin óristetýge, aımaqtyq saýdany damytýǵa yqpal etedi. Odan basqa, bul sanktsııalyq soǵystardyń teris zardaptaryn joıýǵa múmkindik beredi», - dedi Q.Toqaev.
Senat basshysy TMD PAA-ǵa qatysatyn memleketter bul jobaǵa qatysýdyń tıimdiligin qazirgi kezde sezinip otyrǵanyn atap ótti. Osy bastamany odan ári damytý búginde kún tártibinde tur, bul jerde kólik-logıstıkalyq dálizder men tıisti ınfraqurylym qalyptastyrýǵa baılanysty máselelerdi sheshý týraly sóz bolyp otyr.
«Biz parlamentaralyq únqatysýda saýda men ekonomıkalyq yntymaqtastyqty damytý taqyryptarynyń keleshegi zor dep sanaımyz. Depýtattar TMD PAA aıasynda zańnamalyq, normatıvtik baza qalyptastyrýǵa eleýli úles qosa alady. «Bir beldeý, bir jol» tujyrymdamasyn ilgeriletý aýqymdy Eýrazııadaǵy yqpaldastyq úderisterin úılestirýge yqpal etetin bolady», - dep atap ótti Q.Toqaev.
Qazaqstan Senatynyń Tóraǵasy Assambleıanyń bıylǵy jumysynyń qorytyndylaryna oń baǵa berdi. TMD elderiniń parlamentshileri assambleıaǵa múshe elder zańnama, ekonomıkalyq, áleýmettik máselelerde ár el ózderine laıyq sheshimderdi taba alatyn quqyqtyq irgetas qalyptastyrdy. Q.Toqaevtyń pikirinshe, degenmen, qol jetken deńgeıde toqtap qalýǵa bolmaıdy, jumys úderisterin jetildirý úshin kúsh-jigerdi biriktirý jáne ony tsıfrlyq tehnologııanyń damýyn eskere otyryp órkendetý kerek.
