Senat Tóraǵasy Prokýratýra qyzmetkerleri men ardagerlerin mereıtoılarymen quttyqtady
ASTANA. 6 jeltoqsan. QazAqparat - Búgin egemen Qazaqstannyń prokýratýra organdarynyń qurylǵanyna 20 jyl tolýyna oraı Astanada bolǵan saltanatty jınalysqa Parlament Senatynyń Tóraǵasy Qaırat Mámı qatysyp, sóz sóıledi.
Prokýratýra qyzmetkerleri men ardagerlerin mereıtoımen - elimizdegi basty qadaǵalaý organynyń 20 jyldyǵymen quttyqtaı kelip, Q.Mámı Qazaqstan memleketin damytý men nyǵaıtýdaǵy, uıymdasqan qylmys jáne sybaılas jemqorlyqpen kúres, memlekettegi quqyq tártibin kúsheıtýdegi qomaqty úlesin atap ótti.
«Zańdylyqty, azamattardyń quqyqtary men bostandyqtaryn qorǵaýda, qylmyspen kúreste, bılik organdarynyń qyzmetin qadaǵalaýda negizgi róldi prokýratýra atqarady»,-dedi tóraǵa.
Turaqty damýdaǵy jáne ózgerip otyrǵan áleýmettik talaptarǵa jaýap bere alatyn sot jáne quqyq qorǵaý júıesi memlekettiń joǵary jetistikteriniń kepili ekenin atap óte kelip Q.Mámı, prokýrorlyq qadaǵalaýda quqyqtyq jaǵdaılardy jetildirý, prokýratýra qyzmetin zańnamamen qamtamasyz etý máselelerine nazar aýdardy.
«Prokýrorlardyń is-qımylyna zańnamalyq turǵyda kepildikter kúsheıtildi, aldyn alý jáne eskertý jasaýdyń quqyqtyq quraldary keńeıe tústi. Prokýratýra organdarynyń qyzmetkerlerin áleýmettik qorǵaýdy nyǵaıtýǵa barlyq jaǵdaı jasaldy»,-dep atap ótti Q.Mámı.
Qadaǵalaý organdarynyń quqyq qorǵaý baǵytyn atap óte kelip, tóraǵa mamandardyń kásibı biliktiligi, jedel sheshim qabyldaý, talapshyldyq jáne tabandylyq deńgeıine baılanysty adamdardyń zańǵa senimi, ómirdiń barlyq salasyndaǵy quqyqtyq mádenıeti qalyptasatynyn aıtty.
Parlament Senatynyń Tóraǵasy Q.Mámı prokýratýra organdarynyń qurylǵanyna 20 jyl tolýyna oraı belgilengen mereıtoılyq medalmen marapattaldy.
