Senat tóraǵasy nesıe berý jónindegi talaptardy qatańdatýdy usyndy

ASTANA. QazAqparat – Búgin Senattyń jalpy otyrysynda palata tóraǵasy Máýlen Áshimbaev qaryzyn qaıtara almaıtyn azamattarǵa kepilsiz nesıe berýdi shekteýdi usyndy, dep habarlaıdy QazAqparat tilshisi.

Senat tóraǵasy jeke tulǵalardyń bankrottyǵy týraly zań osy jyldyń naýryz aıynda tolyq kúshine enýge tıis ekenin eske saldy. Ol ómirde qıyn jaǵdaıǵa tap bolǵan boryshkerlerge memleket jaǵynan kómek kórsetýge baǵyttalyp otyr.

S. Áshimbaev bolashaqta bankrottyq jaǵdaıdyń kóbeımeýi úshin qarjy uıymdary qaryz alýshylardyń tólem qabilettiligin tekserýge jaýapkershilikpen qaraýy mańyzdy ekenin aıtty.

«Biz tutynýshylardyń qaryzdary kóbeıip kele jatqanyn kórip otyrmyz. Byltyrǵy qorytyndy boıynsha nesıe berý 25%-ǵa artyp, onyń kólemi 7,7 trln teńgege jetti. Bul jerde bızneske qatysty emes, ıaǵnı tutyný nesıesi jóninde aıtylyp tur. Sondyqtan, bolashaqta bankter kepilsiz nesıe alatyn adamdardy muqııat tekserýi úshin zańnamany qatańdatý máselesin eskerý kerek. Eger biz osy baǵytta naqty qadamdar jasamasaq, nesıe berý kóbeıip, odan keletin ekonomıkalyq jáne áleýmettik jaǵdaıdyń saldarynan bankrotqa tap bolatyndar qatary da arta beredi», - dep atap ótti Máýlen Áshimbaev.