Senat Tóraǵasy Muhtar Altynbaevtyń 70 jyldyq mereıtoıyna oraı «Qurmet» gramotasyn tapsyrdy
ASTANA. QazAqparat - Búgin kórnekti qaıratker, Halyq qaharmany, Armııa generaly, senator Muhtar Qapashuly Altynbaevtyń 70 jyldyq mereıtoıyna arnalǵan saltanatty shara barysynda Senat Tóraǵasy Qasym-Jomart Toqaev mereıtoı ıesine «Qurmet» gramotasyn tapsyryp, ıyǵyna shapan japty.
«Muhtar Qapashuly memleket tarıhynda erekshe orny bar tulǵa. Onyń aıbyndy erligi men ómiri Táýelsiz Qazaqstannyń gúldenýi jolynda eńbek etýdiń jarqyn úlgisi. M. Qapashuly óziniń erekshe qarym qabiletiniń, eren eńbeginiń Otan qorǵaýshy jaýynger kásibine degen sheksiz adal qyzmeti arqasynda ushqyshtar ýchılışesiniń qarapaıym kýrsantynan Armııa generaly, Halyq qaharmany ataǵyna deıin kóterilip, kúrdeli eńbek jolynan ótti. Ol Keńes zamanynda-aq dıvızııa basshysy boldy. Alaıda Muhtar Qapashulynyń ómirindegi eń jemisti ári tabysty jyldar Táýelsiz Qazaqstannyń memlekettik qurylysymen qatar kelgeni sózsiz», - dedi Senat Spıkeri óz quttyqtaýynda. Budan bólek, Q.Toqaev Táýelsizdik jyldaryndaǵy M.Altynbaevtyń eren eńbegin, onyń egemen eldiń armııasynyń qýatyn arttyrýǵa baǵyttalǵan qajyrly qaharmandyǵyn aıryqsha atap ótti. Mereıtoı ıesiniń zań shyǵarýshy bıliktegi qyzmetine de erekshe joǵary baǵa berdi. «Muhtar Qapashulynyń mereıtoıyna oraı Senat Bıýrosy ony Qazaqstan Respýblıkasynyń memlekettigi men egemendigin nyǵaıtýǵa, Prezıdenttiń reformalaryn zańnamalyq turǵydan qamtamasyz etýge, qazaqstandyq parlamentarızmdi damytýǵa qosqan qomaqty úlesi úshin Qazaqstan Respýblıkasy Parlamenti Senatynyń Qurmet gramotasymen marapattaý týraly sheshim qabyldady. Onyń ústine biz, Senat depýtattary arnaıy syılyǵymyzdy da daıyndap qoıdyq. Bul - ádettegideı shapan. Ony «Senattyń shapany» dep aıtýǵa bolady», - deı kele Tóraǵa Q.Toqaev mereıtoı ıesin marapattap, ıyǵyna shapan japty.
