Senat tóraǵasy qazaqstandyqtardy Amal merekesimen quttyqtady
«Qurmetti dostar!
Barshańyzdy Amal merekesimen shyn júrekten quttyqtaımyn!
Amal – jańa jyldyń jarshysy, áz-Naýryzdyń basy. Búginde bul kún eldiń bereke-birligin arttyratyn, izgilik pen meıirimdilik sııaqty ıgi qundylyqtardy dáripteıtin jalpyulttyq meıramǵa aınaldy. Sońǵy jyldarda Ulystyń uly kúnin dál osy merekeden bastap atap ótýimiz sonyń jarqyn kórinisi.
Qazirgi tańda Naýryz meıramynyń mazmunyn odan ári baıyta túsýge basa mán berilip jatqany belgili. Bul úrdistiń «Jańa Qazaqstan» qurý jolynda da mańyzy zor. Sebebi, eldik murat pen ulttyq múdde qashanda bárinen bıik turady. Sondyqtan tarıhı sanany jańǵyrtýǵa septigin tıgizetin osyndaı salt-dástúrimiz árdaıym aıryqsha mánge ıe.
Shyn máninde, bul – qystan aman shyqqan aǵaıynnyń arqa-jarqa bolyp, kórisip, kúlimdesetin kúni. Janǵa shýaq syılaıtyn osynaý merekemen quttyqtaı otyryp, ár shańyraqqa shattyq, amandyq jáne baq-bereke tileımin. Amal qutty bolsyn, aǵaıyn!»,-dep jazdy Máýlen Áshimbaev.
