Senat tóraǵasy Qazaqstan-Shveıtsarııa dostyq tobynyń teń tóraǵasy Lombardıdi qabyldady
ASTANA. QazAqparat - Parlament Senatynyń tóraǵasy Qasym-Jomart Toqaev Shveıtsarııa Federaldyq Jınalysyndaǵy Qazaqstan-Shveıtsarııa dostyq tobynyń teń tóraǵasy Fılıppo Lombardıdi qabyldady, dep habarlaıdy QR Parlamenti Senatynyń baspasóz qyzmeti.
Tóraǵa Qazaqstan Shveıtsarııany Eýropadaǵy mańyzdy áriptes retinde qarastyratynyn, elderimiz arasynda syndarly saıası únqatysý qalyptasqanyn atap ótti.
Tóraǵanyń pikirinshe, Prezıdent N.Nazarbaevtyń Shveıtsarııa basshysymen aldaǵy kelissózderiniń eki el arasyndaǵy yntymaqtastyqty óristetýde mańyzy zor. Taraptar parlamentaralyq yntymaqtasty tereńdetýdiń keleshegin talqylady.
Q.Toqaev F.Lombardıdi Senat saılaýynyń nátıjelerimen tanystyryp, onyń barysynda Parlamenttiń joǵarǵy Palatasyna 16 depýtat saılanǵany aıtyldy. Saılaýdy baıqaýǵa halyqaralyq jáne otandyq 518 baıqaýshy, elimizdegi jáne sheteldik buqaralyq aqparat quraldarynyń 244 ókili qatysty. Júzdesýshiler halyqaralyq kún tártibin, saýda-ekonomıkalyq jáne gýmanıtarlyq yntymaqtastyq máselelerin talqylady.
Senat tóraǵasy Ortalyq Azııadaǵy sýǵa qatysty jobalardy qoldaǵany úshin Shveıtsarııaǵa rızashylyǵyn bildirdi. Osyǵan baılanysty Q.Toqaev EKSPO halyqaralyq kórmesi aıasynda sý resýrstary jónindegi birlesip uıymdastyrylǵan aımaqtyq konferentsııanyń mańyzdylyǵyna toqtaldy.
«Shara Ortalyq Azııadaǵy sý resýrstary jónindegi únqatysýlardy ınstıtýttandyrý múmkindikterin zerdeleý úshin erekshe alań boldy», - dep atap ótti Senat basshysy.
Áńgime barysynda Qazaqstan men Shveıtsarııa aımaqtarynyń yntymaqtastyǵyn damytýdyń keleshegi de talqylandy. Almaty oblysy men Tıchıno kantony arasynda qol qoıylǵan ózara túsinistik týraly memorandým eki memleket arasynda dostyq qatynastardy damytý úshin oń yqpal etedi.
