Senat tóraǵasy Qazaqstan halqy Assambleıasynyń qurylym basshylarymen kezdesti

ASTANA. QazAqparat - Senat Spıkeri Máýlen Áshimbaevtyń tóraǵalyǵymen Qazaqstan halqy Assambleıasy qurylymdarynyń basshylarymen kezdesý ótti. Іs-shara barysynda senatorlar men QHA ókilderi aldaǵy birlesken jumystyń basym baǵyttaryn talqylady, dep habarlaıdy QazAqparat.

Otyrysty ashqan Palata Tóraǵasy elimizde Memleket basshysynyń bastamasymen júrgizilip jatqan saıası reformalardyń mańyzyna toqtaldy. Sondaı-aq ol Qazaqstan halqy Assambleıasy kvotasynyń Senatqa berilýi sonyń bir nátıjesi ekenin tilge tıek etti.

«Memleket basshysy Qasym-Jomart Kemeluly Toqaev jalpyulttyq birlik jáne etnıkaaralyq kelisim ıdeıasyn dáripteýge únemi basa mán berip keledi. Bul baǵytta Qazaqstan halqy Assambleıasy erekshe ról atqarady. Assambleıa kvotasynyń Májilisten Senatqa berilýi Prezıdentimizdiń bastamasymen elimizde júrgizilip jatqan saıası reformalardyń mańyzdy bóligi. Qazirgi tańda Assambleıa kvotasymen taǵaıyndalǵan senatorlar zań shyǵarý jumysyna belsendi kirisip, Palata otyrystarynda mańyzdy máselelerdi kóterip júrgenin atap ótken jón», – dedi Máýlen Áshimbaev.

Senat Tóraǵasynyń aıtýynsha, Palatanyń jańa rólin eskere otyryp, Qazaqstan halqy Assambleıasymen ózara jumystyń tıimdi tetikterin aıqyndap alý asa mańyzdy. Sondaı-aq túrli tájirıbelik is-sharalardy Assambleıanyń aldynda turǵan mindetterdi nazarǵa ala otyryp uıymdastyrý máselesi de ózekti ekeni aıtyldy.

Jıyn barysynda Assambleıa kvotasymen taǵaıyndalǵan senatorlar, QHA Tóraǵasynyń orynbasary Marat Ázilhanov jáne taǵy basqalary sóz sóıledi. Qatysýshylar etnosaralyq qarym-qatynas salasyndaǵy janjaldy jaǵdaılardyń aldyn alý máseleleri boıynsha pikir almasyp, osy baǵyttaǵy jumysty odan ári jaqsartý jóninde usynystaryn aıtty.