Senat tóraǵasy qatarǵa byltyr qosylǵan depýtattarǵa qatysty pikir bildirdi
ASTANA. QazAqparat - Senat tóraǵasy Qasym-Jomart Toqaev Parlament Senatynyń ótken jyly jańadan saılanǵan depýtattaryna qatysty pikir bildirdi, dep habarlaıdy QazAqparat tilshisi.
«Senatorlar parlamenttik dıplomatııa aıasynda Elbasynyń halyqaralyq jáne óńirlik qaýipsizdik qamtamasyz etý jolyndaǵy tyń bastamalaryn ilgeriletýge belsendi qatysyp keledi. Palata delegatsııasynyń shetelderge sapary barysynda parlamentaralyq yqpaldastyqty tereńdetýge erekshe mán berildi. Óz máresine jetken úshinshi sessııa jumysyn biz jańa quramda bastaǵan bolatynbyz. Qatarymyzǵa qosylǵan áriptesterimiz ózderiniń mol ómirlik tájirıbesin jańa parlamenttik qyzetterinde utymdy paıdalanyp, palatanyń zań shyǵarý jumysynyń pármendiligin arttyrýǵa laıyqty úles qosqanyn atap ótkim keledi», - dedi Senat tóraǵasy.
Sonymen qatar Q. Toqaev jaz aılarynda senatorlar óńirlerde jumystaryn júrgizetinin, jergilikti turǵyndarǵa qabyldanǵan zańdar men memlekettik baǵdarlamalardyń máni men maqsatyn nasıhattaıtynyn atap ótti.
«Barshańyzǵa sessııa barysynda birlesip atqarǵan nátıjeli qyzmetterińizge, Uly Dala elin keshendi jańǵyrtý jolynda Elbasynyń árqaısymyzǵa júktegen jaýapkershilik salmaǵyn tereń sezinip, jemisti jumys istegenderińiz úshin rızashylyǵymdy bildiremin», - dep túıdi Senat tóraǵasy.
Esterińizge sala keetıik, 2017 jyly 28 maýsymda Senat depýtattarynyń saılaýy ótip, Parlamenttiń joǵary palatasynyń quramy Konstıtýtsııa boıynsha jańardy.
Budan buryn habarlanǵandaı, búgin Qasym-Jomart Toqaev Parlament Senatynyń úshinshi sessııasynyń jumysyn qorytyndylady.
Elbasynyń Joldaýy jáne halyqtyń ál-aýqatyn kózdeıtin Bes áleýmettik bastamasynan týyndaıtyn aýqymdy mindetterdi júzege asyrý barysynda Parlament 84 zań qabyldady. Jalpy sessııa barysynda 101 depýtattyq saýal joldandy. Budan bólek, Senattyń turaqty komıtetteri ótkizgen 23 kóshpeli otyrys, 14 dóńgeldek ústel, 19 kezdesý aıasynda zańdardyń jáne memlekettik baǵdarlamalardyń oryndalýy barysy egjeı-tegjeıli talqylandy.
