Senat tóraǵasy Qatar Elshisin qyzmetiniń bastalýymen quttyqtady
ASTANA. QazAqparat - Senat tóraǵasy Qasym-Jomart Toqaev Qatar memleketiniń Qazaqstandaǵy Elshisi Ahmad al-Tamımıdi onyń ótinishi boıynsha qabyldady.
Tóraǵa dıplomatty Qazaqstandaǵy qyzmetiniń bastalýymen quttyqtady jáne onyń jumysy tabysty bolýyna tilektestigin bildirdi.
«Qazaqstan álem qoǵamdastyǵynyń yqpaldy múshesi ári qazirgi zamandaǵy Taıaý Shyǵystaǵy órkendegen memlekettiń biri bolyp tabylatyn Qatarmen ózara tıimdi baılanystardy damytýǵa jáne tereńdetýge erekshe mán beredi», - dedi Q.Toqaev.
Senat tóraǵasy Sırııadaǵy jaǵdaıdy retteý jónindegi Astanada ótip jatqan kelissózderdiń teńdesi joq erekshe sıpaty bar ekenin atap ótti. Olar bir jaǵynan bul shıelenisti retteýge búkil álem qaýymdastyǵynyń nazary aýyp otyrǵanyn, ekinshi jaǵynan Qazaqstan áleýetiniń jáne osynaý kúrdeli istegi Elbasy Nursultan Nazarbaevtyń bedeli men ádil bitimger retinde moıyndalǵanyn pash etti: «Bizdiń elimiz ózin álemdik dıplomatııadaǵy jetekshi tuǵyrnamalardyń biri retinde kórsetti». Q.Toqaevtyń pikirinshe, osy kezdesýlerdiń naqty nátıjeleri qandaı bolsa da, Astana úderisteri bul kúrdeli másele boıynsha aldaǵy Jenevadaǵy kelissózderge eleýli serpin beretin bolady.
