Senat Tóraǵasy Q.Mámı: saılanǵan árbir ákim halyqtyń senimin aqtap, azamattar aldyndaǵy jaýapkershiligin uǵynýy tıis
ASTANA. 22 tamyz. QazAqparat - Qazaqstan Respýblıkasy Parlamenti Senatynyń Tóraǵasy Qaırat Mámı Aqmola oblysynda taıaýda saılanǵan aýyldyq okrýgter ákimderimen jergilikti ózin-ózi basqarýdy damytýdyń keleshegin talqylady.
Bul týraly QR Parlamenti Senatynyń baspasóz qyzmeti habarlady.
Senat Tóraǵasy jergilikti bılik basshylaryn mańyzdy qoǵamdyq-saıası oqıǵamen quttyqtady jáne aýyl ákimderi saılaýynyń nátıjeleri boıynsha Qazaqstan Respýblıkasynyń Prezıdenti N.Nazarbaevtyń Úndeýinde alǵa qoıylǵan mindetterge jan-jaqty toqtaldy.
«Elimizdiń saıası júıesin jańǵyrtý, jergilikti jerlerdegi basqarý júıesin reformalaý, jergilikti ózin-ózi basqarýǵa belsendi qatysýdy ulǵaıtý jolynda mańyzdy qadam jasaldy», - dep atap ótti Q.Mámı. Ol sondaı-aq jergilikti ózin-ózi basqarýdy odan ári damytý jergilikti halyqtyń áleýmettik belsendiligin arttyryp, azamattardyń jańa bastamalaryna serpin beretin bolady, dedi.
Ótken sessııada Parlament Memleket basshysynyń tapsyrmasy boıynsha ázirlengen eki zańdy qabyldady. Soǵan sáıkes, aýyl ákimderine qosymsha ókilettikter berilip, tómengi deńgeıdegi ákimderdiń qarjylyq jáne ekonomıkalyq derbestigi keńeıtildi, jergilikti organdar basshylaryna ózderiniń kiris kózderin qalyptastyrý quqyqtary berildi. Odan basqa, turǵyndardyń jıyndary men jınalystary jergilikti mańyzy bar máselelerdi sheshýge bólingen bıýdjet qarjysyn paıdalanýǵa monıtorıng júrgizý ókildigine ıe boldy.
«Jergilikti ózin-ózi basqarýdy damytýdyń zańdarda qarastyrylǵan tetikteri aımaqtardaǵy kásipkerlik ortalar men iskerlik belsendilikti arttyrýǵa, halyqtyń kókeıkesti máselelerin sapaly sheshýge, tutas alǵanda, jergilikti jerlerdegi istiń ahýalyn jaqsartatyn bolady», - dep atap ótti Senat Tóraǵasy.
Q.Mámı saılanǵan árbir ákim halyqtyń senimin aqtap, azamattar aldyndaǵy jaýapkershiligin uǵynýy tıis ekenin atap ótti.
