Senat Tóraǵasy Halyqaralyq volonterler kúnimen quttyqtady
«Búgin álem boıynsha Halyqaralyq volonterler kúni atalyp ótýde. Osyǵan oraı elimizdegi barlyq volonterdi ataýly kúnmen quttyqtaımyn!
Kóptegen damyǵan elderde volonterlerdiń qoǵamdaǵy róli erekshe. Sońǵy kezderi Qazaqstanda da bul úrdistiń aıasy keńeıip, qarqyndy damyp kele jatqany qýantady. Oǵan Memleket basshysynyń 2020 jyldy «Volonter jyly» dep jarııalaýy da tyń serpin bergeni anyq.
Sonyń nátıjesinde kóptegen ıgilikti ister men naqty jobalar qolǵa alyndy. Jastarymyzben birge egde jastaǵy azamattardyń da belsendiligi arta bastady. Ásirese, pandemııamen kúres kezinde volonterlerdiń el úshin atqarǵan eren eńbegin aıryqsha atap ótken jón. Bul – patrıotızmniń, qaıyrymdylyqtyń jáne qamqorlyqtyń jarqyn kórinisi.
Jalpy, erikti bolý qazaqqa jat dúnıe emes. Asar sııaqty kóptegen salt-dástúrimiz osy bastamamen úndes ekenin bárimiz jaqsy bilemiz. Sondyqtan aldaǵy ýaqytta Qazaqstanda volonterliktiń mańyzy artyp, elimizde eriktilerdiń qatary kóbeıedi dep senemin.
Volonter kúni qutty bolsyn!», - delingen M.Áshimbaevtiń Facebook-tegi jazbasynda.