Senat tóraǵasy Grýzııanyń premer-mınıstrimen kezdesti
M. Bahtadze Grýzııa tarıhynda jáne eki el arasyndaǵy dostyq qarym-qatynastardy damytýdaǵy Qazaqstannyń Tuńǵysh Prezıdenti N.Nazarbaevtyń rólin joǵary baǵalady.
Senat basshysy Grýzııa tarapyna qazaqstandyq bastamalardy qoldaǵany, atap aıtqanda, Astana ekonomıkalyq forýmyna qatysýy jáne qoldaý bildirgeni úshin rızashylyǵyn bildirdi. Grýzııa premer-mınıstri Astana ekonomıkalyq forýmynyń ereksheligine toqtala kelip onyń nátıjege baǵyttalǵanyn atap ótti.
Saýda-ekonomıkalyq áriptestikti keńeıtý, mańyzdy ınfraqurylymdyq jáne logıstıkalyq jobalar týraly aıta kelip, D. Nazarbaeva kólik-tranzıt salasyndaǵy ózara is-qımyldy óristeti qajettigin atap ótti. «Tranzıttik múmkindikterdi paıdalaný tıimdiligin arttyrý jónindegi Qazaqstan men Grýzııanyń múddeleri sáıkes keledi. Bizdiń memleketterdiń aýmaǵy arqyly iri transqurlyqtyq kólik dálizderi ótedi. Bul zor artyqshylyqty paıdalaný kerek», - dedi Senat tóraǵasy.
Taraptar týrıstik áleýet pen gýmanıtarlyq yntymaqtastyqty keńeıtýdiń keleshegin talqylady. Grýzııa Premer-mınıstri Grýzııanyń Jalpy ishki óniminiń 6 paıyzy eldegi bilim berýdi damytýǵa baǵyttalatyn jańa zań týraly habardar etti. Ol eki eldiń joǵary oqý oryndaryna yntymaqtastyqty belsendi damytýdy usyndy.
Senat tóraǵasy eldegi mańyzdy ishki saıası oqıǵalar, qazaqstandyqtardyń keleshekke zor senimmen qaraıtyny týraly aıta kelip, elimizdegi prezıdent saılaýy jónindegi saılaý naýqanynyń barysy týraly áńgimeledi.
D.Nazarbaeva sondaı-aq Grýzııany kele jatqan Táýelsizdik kúnimen quttyqtady. «Jeńimpaz Grýzııa halqynyń órkendep, damýyna tilektespin. Bul maqsatta jaqyn bolashaqta qol jetkizetinine senimdimin»,- dedi Senat tóraǵasy.
