Senat Tóraǵasy Frantsııa Elshisimen kezdesti
Kezdesý barysynda eki el arasyndaǵy yntymaqtastyqty odan ári nyǵaıtý, onyń ishinde parlamentaralyq baılanysty arttyrý máseleleri sóz boldy.
«Qazaqstan Parlamentiniń eki palatasynda da Frantsııa Parlamentimen yntymaqtastyq boıynsha top jumys isteıdi. Biz parlamentaralyq baılanysymyzdyń serpindi qarqynyn saqtaýǵa jáne frantsýz parlamentarıimen syndarly jumys isteýge múddelimiz», – dedi Máýlen Áshimbaev.
Sonymen qatar Senat Tóraǵasy elderimiz arasyndaǵy mádenı-gýmanıtarlyq baılanystyń tabysty damyp kele jatqanyn atap ótti. Eki memlekettiń qoldaýymen 2018 jyly «Abaı-Vern» halyqaralyq bilim baǵdarlamasy qolǵa alynǵan edi. Búginde osy bastama boıynsha alǵashqy stıpendıattar Frantsııada oqýlaryn aıaqtap úlgerdi.
«Qazaqstandyq stýdentter Frantsııada «Bolashaq» baǵdarlamasy boıynsha da bilim alýda. Qazirgi tańda bul baǵdarlamanyń túlekteri elimizde memlekettik qyzmette jáne jeke sektorda laıyqty eńbek etip júr. Sondaı-aq, Almatyda «Sorbonna-Qazaqstan» ınstıtýtynyń jemisti jumysyn atap ótken jón. Qazaqstannyń birneshe qalasynda «Alıans-Fransez» mádenı-bilim berý agenttiginiń ókildikteri jumys isteıdi. Munyń bári elderimizdiń mádenı-gýmanıtarlyq saladaǵy yntymaqtastyǵynyń naqty nátıjesi ekeni sózsiz», – dedi Senat Tóraǵasy.
Odan bólek, Máýlen Áshimbaev Qazaqstan Parlamentiniń Senaty ekijaqty yntymaqtastyqqa qatysty osy jáne basqa da máseleler boıynsha tıisti jumystardy atqaryp, Qazaqstan men Frantsııa arasyndaǵy qarym-qatynasty ári qaraı nyǵaıtýǵa yqpal etýdi jalǵastyra beretinin jetkizdi.
