Senat Tóraǵasy Elbasyna Úndeý joldady
Qazaqstan Respýblıkasynyń Tuńǵysh Prezıdenti – Elbasy,
Qurmetti Senator N.Á.NAZARBAEVQA
Asa Mártebeli Nursultan Ábishuly!
Qazaqstan Respýblıkasy Parlamentiniń Senaty Sizdiń tezirek saýyǵyp ketýińizdi tileıdi!
Boıyńyzdaǵy erik-jigerińiz ben kúsh-qaıratyńyz Sizge árdaıym barlyq qıyndyqtardan súrinbeı ótýge septigin tıgizip keledi. Sizdiń asqaq rýhyńyz ben tabandylyǵyńyzdyń arqasynda elimiz túrli áleýmettik jáne ekonomıkalyq daǵdarystardy eńsere bildi. Sizdiń dana, sarabdal saıasatyńyzdyń nátıjesinde elimiz táýelsizdik jyldarynda memlekettiliktiń berik negizin qalap, tatýlyq pen turaqtylyqty, beıbitshilik pen kelisimdi saqtaı aldy.
Búkil álem Ózińizdi táýelsiz Qazaqstannyń negizin qalaýshy tulǵa, kóregen saıasatker retinde moıyndap, asa qurmetteıdi.
Qazir álemdik kóshbasshylardan, úlken ujymdardan jáne qatardaǵy azamattardan Sizdiń atyńyzǵa myqty densaýlyq pen uzaq ǵumyr tilegen hattar legi kóptep kelip túsýde. Munyń bári Sizdiń álemdik qoǵamdastyqta da zor abyroı-bedelge ıe kemeńger qaıratker ekenińizdiń aıqyn dáleli.
Qazirgi tańda barsha Qazaqstan halqy Sizdiń densaýlyǵyńyzǵa alańdap, qobaljýda. Degenmen, biz Sizdiń bul synaqtan da súrinbeı ótetinińizge kámil senemiz.
Siz buǵan deıin de talaı qıyn-qystaý kezeńder men taǵdyrsheshti sátterdi eńserip, sonyń bárinen elimizdi aman-esen alyp shyqtyńyz.
Ózińizdiń ónegege toly ómirlik baı tájirıbeńiz ben aqyl-oıyńyz, bilimińiz ben parasatyńyz jáne kóshbasshylyq dara qasıetińiz halqymyz ben elimiz úshin damýdyń jańa kezeńinde de asa qajet.
Salıqaly saıasatyńyzdyń sabaqtastyǵy aıasynda elimiz áli talaı bıik belesterdi baǵyndyrady dep senemiz.
Sizdiń Qurmetti Senator bolýyńyz da biz úshin úlken abyroı jáne zor maqtanysh.
Barlyq senatorlar Sizge zor densaýlyq, uzaq ǵumyr jáne Otanymyz – Qazaqstannyń odan ári ósip-órkendeýi jolyndaǵy qyzmetińizge tolaıym tabys tileıdi!
Іzgi nıetpen, Qazaqstan Respýblıkasy
Parlamenti Senatynyń Tóraǵasy Máýlen Áshimbaev