Senat tóraǵasy Darıǵa Nazarbaeva Túrikmenstan elshisin qabyldady
NUR-SULTAN. QazAqparat - Qazaqstan Respýblıkasy Parlamenti Senatynyń tóraǵasy Darıǵa Nazarbaeva Túrikmenstannyń Qazaqstandaǵy elshisi Toıly Kómekovti onyń ótinishi boıynsha qabyldady, dep habarlaıdy QR Parlamenti Senatynyń baspasóz qyzmeti.
D.Nazarbaeva meımandy qarsy ala otyryp, bizdiń elderimizdi kóp ǵasyrlyq dostyq pen ózara qurmetke negizdelgen ári strategııalyq áriptestik deńgeıine jetken tatý kórshilik qarym-qatynastar baılanystyratynyn atap ótti.
Taraptar memleketaralyq ózara is-qımyldyń mańyzdy quramdas bóligi bolyp tabylatyn parlamentaralyq yntymaqtastyqty nyǵaıtýdyń keleshegin talqylady. Senat basshysy parlamentaralyq qatynastarǵa qarqyn berýdi usyndy. T. Kómekov D. Nazarbaevaǵa Ashhabadqa resmı saparmen kelýge, sondaı-aq Avazadaǵy alǵashqy Kaspıı ekonomıkalyq forýmyna qatysýǵa shaqyrýdy tabys etti.
Júzdesýshiler Elbasy N.Á.Nazarbaev pen Túrikmenstan Prezıdenti G.M. Berdimuhamedovtiń ózara saýdada mıllıardtyq mejege qol jetkizý jónindegi bıik mindetterin iske asyrýǵa ázir ekendikterin naqtylady.
D.Nazarbaevanyń pikirinshe, Ekonomıkalyq, ǵylymı-tehnıkalyq jáne mádenı yntymaqtastyq jónindegi birlesken úkimetaralyq komıssııa ekijaqty taýar aınalymyn arttyrý jónindegi alǵa qoıylǵan mindetterdi iske asyrýdyń pármendi tetigi bolýy tıis.
Shekara mańyndaǵy yntymaqtastyqtaǵy ózara is-qımyldyń keleshegi talqylandy. Senat basshysy Mańǵystaý oblysynyń túrikmen tarapynyń qaraýyna usynylǵan 13 baǵyt boıynsha usynystaryna nazar aýdardy. Túrkmenbashı - Garabogaz - Qazaqstan avtomobıl joly men Garabogazgol shyǵanaǵy arqyly ótetin jańa kópirdiń qurylysy jónindegi jobalar taýar aınalymyn, júk jáne jolaýshylar tasymalynyń kólemin ulǵaıtýǵa yqpal etetin bolady.
D. Nazarbaeva dıplomatqa eldiń ishki saıası ómiri týraly áńgimeledi jáne Qazaqstannyń qazirgi zamanǵy saıası júıesi bıliktiń, memlekettiń saıası jáne ekonomıkalyq damýynyń tolyq sabaqtastyǵyn qamtamasyz etetinin atap ótti. Senat basshysy Parlament joǵarǵy Palatasynyń basty mindeti - Qazaqstannyń Tuńǵysh Prezıdentiniń birinshi kezekte halyqtyń ál-aýqatyn arttyrýǵa, demokratııalyq damý úlgisi negizinde azamattyq qoǵam ınstıtýttary men zań ústemdigin kúsheıtýge arnalǵan baǵyttaryn zańnamalyq qamtamasyz etý ekenin atap ótti.
T.Kómekov N.Á.Nazarbaevtyń ıadrolyq qarýǵa qarsy qozǵalystaǵy, ıntegratsııalyq úderisterdi ilgeriletýdegi kóshbasshylyq rólin atap óte kelip, Elbasynyń jahandyq jáne aımaqtyq qaýipsizdikti qamtamasyz etýge qosqan úlesin joǵary baǵalady. Ol Qazaqstan astanasynyń ataýyn Nur-Sultan etip ózgertýdi Túrkimenstan oń qabyldaǵanyn jáne túrki áleminiń bedeldi kóshbasshysynyń baǵa jetpes eńbegin máńgi este qaldyrǵany týraly habardar etti.
