Senat Tóraǵasy: Bizdiń basty mindetimiz - Elbasy Joldaýyn zańnamalyq qamtamasyz etý
Bıýro jumysyn ashqan Senat Tóraǵasy Tórtinshi ónerkásiptik revolıýtsııa qarsańyndaǵy múldem jańa jaǵdaıda elimizdi odan ári damytýda sapaly zańnamalyq qamtamasyz etýdiń mańyzdy ekenin atap ótti. Elbasy Joldaýy memleketimizdiń jańa álemge beıimdelýine qatysty asa ózekti saýaldarǵa tolyqtaı jaýap beredi, - dedi Q.Toqaev. «Prezıdent yqtımal syn-qaterler men qaýipti eskere otyryp, bolashaq álem qurylymyndaǵy irgeli ózgeristerge jan-jaqty ázir bolýǵa shaqyrdy. Sondyqtan biz osy jaǵdaılarǵa tolyq daıyndyqpen bet burýymyz qajet», - dep kórsetti Senat Tóraǵasy. Osy oraıda Q.Toqaev Joldaýdaǵy Memleket basshysy belgilegen negizgi mindetterdiń oryndalýyn zańnamalyq jaǵynan qamtamasyz etý boıynsha keshendi is-sharalar qabyldaýǵa qatysty Senat aldyna mindetter qoıdy. Parlament Joǵary palatasynyń Tóraǵasy Elbasy birinshi kezekte qabyldaýdy belgilegen zańdarǵa áripesteriniń nazaryn aýdardy. Eń aldymen qabyldanýy tıis zańdardyń qatarynda venchýrlik qarjylandyrý, bıznesti retteýge qatysýdy azaıtý, tabıǵı monopolııalar, joǵary oqý oryndarynyń akademııalyq erkindigi máselelerin zańnamalyq jaǵynan retteý mindetteri bar. Senat Tóraǵasy Elbasynyń bankterden offshorlyq kompanııalarǵa qarjy shyǵarǵany úshin jaýapkershilikti kúsheıtý, jeke tulǵalardyń bankrottyǵy jáne elektrondyq eńbek bırjasy týraly jańa zańdar qabyldaý týraly tapsyrmasyn eske saldy. «Taǵy bir basty mindet - «Halyq densaýlyǵy jáne densaýlyq saqtaý júıesi týraly» kodekstiń jańa mátinin qabyldaý jáne Ekologııalyq kodekske ýaqyt talabyna sáıkes ózgertý máselelerin qaraý qajet»,- dedi Q.Toqaev. Tóraǵa el damýynyń jańa kezeńine qajetti zańdardy sapaly ári der kezinde qabyldaýǵa Parlament Senatynyń áleýeti jetkilikti ekenine senim bildirdi.
Bıýro otyrysynda Prezıdent Joldaýyn iske asyrý jónindegi Senattyń is-sharalar jospary bekitildi. Jospardyń kún tártibine Senattyń turaqty komıtetteriniń aımaqtarda kóshpeli otyrystaryn, «Kásiptik bilim berý sapasyn zańnamalyq turǵydan qamtamasyz etýdiń ózekti máseleleri»,«Sottar men quqyq qorǵaý organdaryn tsıfrlandyrýdy quqyqtyq qamtamasyz etý», «Astana aınalasyndaǵy azyq-túlik beldeýi: jaı-kúıi jáne perspektıvalary» taqyryby boıynsha dóńgelek ústelder jáne basqa da otyrystar ótkizý engizildi. Budan bólek, jol júrisi qaýipsizdigi, kólik-logıstıka ınfraqurylymynyń tıimdiligin arttyrý jáne temirjol mashına jasaýdy odan ári damytý, latyn álipbıine kóshý jáne qazaq tilindegi termınologııa salasyndaǵy zańnamany jetildirý, «Qazaqstan kıberqalqany» kıberqaýipsizdik tujyrymdamasyn iske asyrý, jemqorlyqqa qarsy strategııany júzege asyrý máseleleri boıynsha múddeli memlekettik organdar basshylyǵymen kezdesý qarastyrylǵan. Senattyń turaqty komıtetterine olardyń qyzmeti Prezıdent Joldaýynda qoıylǵan mindetterdi naqty iske asyrýǵa tikeleı baılanysty bolýy qajettigi tapsyryldy.
Bıýro Senat depýtattarynyń óńirlerge saparlarynyń qorytyndylary jóninde turaqty komıtetter tóraǵalarynyń aqparatyn tyńdady. Q.Toqaev óz sózin túıindeı kele, Memleket basshysynyń Joldaýyn halyqqa jetkizý boıynsha aımaqtarda júrgizilgen jumysty odan ári jalǵastyrýdy tapsyrdy. Tóraǵa kezdesýlerde aıtylǵan syndarly usynystardy, óńirlerdegi kóterilgen máselelerdi eńserý joldaryn zań shyǵarý jumysynda eskerýdi usyndy. «Depýtattar zańnamada aıqyndalǵan quzyretterin barynsha paıdalanyp, kóterilgen máselelerdiń ońtaıly sheshim tabýyna jan-jaqty yqpal etýleri tıis» ,- dep qorytyndylady Q.Toqaev.
Otyrys barysynda Konstıtýtsııalyq zańnama, sot júıesi jáne quqyq qorǵaý organdary komıtetine Joǵarǵy Sot sýdıalaryn qyzmetten bosatý týraly Qazaqstan Respýblıkasy Prezıdentiniń usynýyna qatysty qorytyndy daıarlaý tapsyryldy. Bıýro músheleri sondaı-aq, 25 qańtarda ótetin kezekti Senattyń otyrysynyń kún tártibin kelisti. Senatorlar Joǵarǵy Sot sýdıalaryn qyzmetten bosatý týraly; Qazaqstan men Ázerbaıjan úkimetteri arasyndaǵy Halyqaralyq avtomobıl qatynasy týraly kelisimdi ratıfıkatsııalaý týraly; Qazaqstan men Úndistan arasyndaǵy Qosarlanǵan salyq salýdy boldyrmaý jáne tabys pen kapıtalǵa salynatyn salyqtarǵa qatysty salyq salýdan jaltarýǵa jol bermeý týraly konventsııaǵa jáne Hattamaǵa ózgerister men tolyqtyrýlar engizý týraly úkimetaralyq hattamany ratıfıkatsııalaý týraly zań jobalaryn qaraıtyn bolady.
