«Senat Tóraǵasy bir jylda eki ret saılandy» - respýblıkalyq basylymdarǵa sholý
TANA. 25 qarasha. QazAqparat - Qazaq aqparat agenttigi respýblıkalyq basylymdarda 25 qarasha, juma kúni shyqqan ózekti materıaldarǵa sholýdy usynady.
***
«Keshe Ortalyq saılaý komıssııasynyń tóraǵasy Qýandyq Turǵanqulovtyń tóraǵalyq etýimen Komıssııanyń kezekti otyrysy ótti. Otyrysta Ortalyq saılaý komıssııasy Prezıdenttiń Jarlyǵymen taǵaıyndalǵan Parlament Senatynyń depýtattaryn tirkedi jáne Qazaqstan Respýblıkasy máslıhattarynyń depýtattyǵyna kandıdattardyń respýblıkalyq bıýdjet qarajatynan jabylatyn shyǵystarynyń normatıvterin bekitti», - dep jazady «Egemen Qazaqstan» gazeti búgingi sanyndaǵy «Taǵaıyndalǵan senatorlarǵa kýálikter tapsyryldy» degen taqyryptaǵy maqalasynda. Basylymnyń atap ótýinshe, oblystyq, Astana jáne Almaty qalalyq máslıhattarynyń depýtattyǵyna kandıdat retinde tirkelgen árbir úmitkerge úgit sharalary men kólik shyǵystaryna bıýdjetten 349 myń teńge, al qalalyq jáne aýdandyq máslıhattardyń depýtattyǵyna kandıdattar úshin 179 myń teńge bólinetin bolady.
«Egemen Qazaqstan» gazetiniń habarlaýynsha, Táýelsizdik kúni qarsańynda Memleket basshysynyń Jarlyǵymen qazaqstandyqtardyń úlken toby respýblıka aldyndaǵy sińirgen eńbegi, belsendi qoǵamdyq qyzmeti, Qazaqstan Respýblıkasynyń memlekettiliginiń damýy men qalyptasýyna jáne egemendiginiń nyǵaıýyna qosqan eleýli úlesi úshin «Qazaqstan Respýblıkasynyń táýelsizdigine 20 jyl» merekelik medalimen marapattaldy. Marapattalǵandardyń qatarynda kásiporyndar, aktsıonerlik qoǵamdar, sharýa qojalyqtarynyń basshylary, óndiristik salanyń jumysshylary, ǵylym jáne mádenıet qaıratkerleri, áleýmettik sala, bıznes, qoǵamdyq birlestikter ókilderi, quqyq qorǵaý organdarynyń qyzmetkerleri men áskerı qyzmetshiler, soǵys jáne eńbek ardagerleri, memlekettik qyzmetshiler bar.
***
«Búgingi tańda Ýkraına Kedendik odaqtyń quramyna kirýden bas tartsa da, Qazaqstan, Reseı jáne Belarýs sııaqty úsh eldiń úlken naryǵyn joǵaltqysy kelmeıdi. Sol sebepti de resmı Kıev «3+1» formatynda áriptestik baılanystardy júrgizýdi usynǵan. Alaıda Reseı onymen kelispeı otyr. Qazaqstan bolsa, Ýkraınanyń bul ustanymyn qoldap, ekijaqty saýda-ekonomıkalyq qarym-qatynastardy ary qaraı damytýǵa múddeli», dep jazady «Alash aınasy» gazeti búgingi sanyndaǵy «Qazaqstan Ýkraınanyń «3+1» ustanymyn qoldaıdy» degen taqyryptaǵy maqalasynda. Basylymnyń atap ótýinshe, keshe Astanada kezdesken Ýkraınanyń Premer-mınıstri Nıkolaı Azarov pen Úkimet basshysy Kárim Másimov eki eldiń yntymaqtastyǵyn kózdeıtin is-sharalar josparyn jalǵastyrýǵa ýaǵdalasty. Qazaqstan Kedendik odaq aıasynda Ýkraına úshin týyndaıtyn san alýan negizsiz kedergilerdi de joıýǵa kómektespek.
«Alash aınasy» gazetiniń jazýynsha, keshe Senattyń jalpy otyrysynda Elbasynyń Jarlyǵyna sáıkes taǵaıyndalǵan hám qaıta taǵaıyndalǵan depýtattar joǵarǵy palatanyń jumysyna kirisip, uzaq jyldar boıy zań shyǵarmashylyǵy salasynda Prezıdenttiń taǵaıyndaýymen qyzmet etken úsh depýtat ókilettiginiń aıaqtalýyna baılanysty ornynan bosady. Toqtala ketetin jaıt, aǵymdaǵy jyldyń sáýirinde Qasym-Jomart Toqaevtyń ornyna spıker laýazymyna kelgen senator Qaırat Mámıdiń depýtattyq ókilettigi de aıaqtalǵan edi. Al Konstıtýtsııanyń 50-baby 2 tarmaǵyna sáıkes, ókilettik merzimi aıaqtalǵan depýtattardyń ornyna taǵaıyndaý barysynda Qaırat Mámı Elbasynyń senimine qaıtadan ıe bolǵan edi. Endeshe jańa qurammen tolyqqan Senattyń tóraǵasyn qaıta saılaýdy zań talap etedi. Osyǵan oraı, Memleket basshysy Q.Mámı kandıdatýrasyn qaıta usynyp, jasyryn daýys bergen 46 senator biraýyzdan Elbasynyń usynysyna qoldaý bildirgen. Maqala «Senat Tóraǵasy bir jylda eki ret saılandy» degen taqyryppen berilgen.
***
El bolyp eńsemizdi kótergenimizge de jıyrma jylǵa taıap qaldy. Bul jyldary halyqtyń fılosofııalyq jáne tarıhı sanasynda ózgerister boldy ma, ulttyń rýhanı qundylyqtaryn qanshalyqty saqtap qaldyq? Osy sekildi san túrli saýaldarǵa «Aıqyn» gazeti arqyly QR Ulttyq ǵylym akademııasynyń akademıgi Ábdimálik Nysanbaev pen fılosofııa ǵylymdarynyń doktory Baqytjan Satershınov jaýap beredi. Máselen, Á.Nysanbaev: «Shyntýaıtyna kelgende, túrkilik babalarymyzdyń danalyqqa toly qushtarlyǵy men tujyrymdary tek qana qazaq halqy úshin ǵana emes, jalpy, túrkitildes halyqtarǵa, odan keńirek alsaq adamzat balasyna rýhanı baǵdar bolyp tabylady», - deıdi. eki ǵalymnan alynǵan suhbat «Qazaq fılosofııasy - rýhanı táýelsizdigimizdiń kórinisi» degen taqyryppen berilgen.
Kelesi jyly fýtboldan ótetin Eýropa chempıonatyna qatysatyn ulttyq quramalar ótken aptada tolyqtaı belgili boldy. Osyǵan oraı «Aıqyn» gazetinde «Jeltoqsanda jerebe tartylady» degen taqyryppen maqala jarııalandy. «Birden aıta keteıik, bir jyldan astam ýaqytqa sozylǵan irikteý básekeleri barysynda aıtarlyqtaı tosyn oqıǵalar tirkelgen joq. Myqtylar Polsha men Ýkraınada jalaýy jelbireıtin jarysqa joldama alsa, ortańqol men osaldary jarty jolda qalyp qoıdy», - dep jazady basylym.
***
«Memleket basshysy Nursultan Nazarbaev keshe Ýkraına Premer-Mınıstri Nıkolaı Azarovty qabyldady», - dep jazady «Kazahstanskaıa pravda» gazeti. Basylymnyń atap ótýinshe, kezdesý barysynda ekijaqty qarym-qatynastardyń keń kólemdi máseleleri, atap aıtqanda, ınvestıtsııa jáne saýda-qarjy salasyndaǵy yntymaqtastyq máselesi talqylandy. Aǵymdaǵy jyldyń 10 aıynda eki eldiń arasyndaǵy saýda aınalymy 70 paıyzǵa ósip, 2,5 mlrd. AQSh dollaryn qurady. Qazaqstan Ýkraınanyń Reseı Federatsııasynan keıingi iri saýda seriktesi bolyp tabylady.
