Senat tóraǵasy BAQ ókilderin marapattady
ASTANA. QazAqparat - Parlament Senatynyń tóraǵasy Qasym-Jomart Toqaev baılanys jáne aqparat salasy qyzmetkerleriniń merkesine oraı birqatar BAQ ókilderin marapattady, dep habarlaıdy QazAqparat.
«Barshalaryńyzdy kásibı merekemen quttyqtaı otyryp, sizderge myqty densaýlyq, zor tabys tileımin! Otanymyzdyń órkendeýi jolyndaǵy ıgilikti isterimizdiń berekeli bolýyna tilektespin. Senat depýtattary retinde osy zalda otyrǵan aqparat salasynyń maıtalmandaryna úlken qurmetpen qaraıdy. Sizderdiń kásibı sheberlikterińizdi, otansúıgishtik adamgershilik qasıetterińizdi joǵary baǵalaımyz. Buqaralyq aqparat quraldarynyń róli turaqty túrde ósip keledi. Tipti, áleýmettik jeliler paıda bolsa da, dástúrli BAQ-tyń róli báseńdemeıdi, kerisinshe olar ozyq tehnologııalardy jumys quralyna aınaldyryp otyr. Bizdiń eldegi jýrnalıstıka aýqymdy reformalardyń udaıy aldyńǵy sapynda. Baspa jáne elektrondyq basylymdar mıllıondaǵan adamdardyń kóńil túkpirinen berik oryn aldy. «Kóp sóz utpaıdy, dóp sóz utady» demekshi, otandyq buqaralyq aqparat quraldary kásibı túrde sheber, shynaıy jáne jedel jumys júrgizýde. Depýtattar sizderdi árdaıym maqtan tutady», - dep atap ótti Qasym-Jomart Toqaev.
Sonymen, Parlament Senatynyń Qurmet gramotasymen «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli, «QazAqparat» HAA bas dırektory Asqar Ýmarov, «Nur Medıa» holdınginiń bas dırektory Janaı Omarov, «Astana» arnasynyń bas dırektory Lázzat Tanysbaı, Atameken Business Channel telearnasynyń bas dırektory Qanat Saharııanov, «Habar» agenttigi» AQ-nyń basqarma tóraǵasy Alan Ájibaev, «Aıqyn» gazetiniń bas redaktory Nurtóre Júsip jáne ózge de BAQ basshylyǵy marapattaldy.
Budan bólek, Senat tóraǵasynyń Alǵys hattary «Ana tili» gazetiniń bas redaktory Samat Ibraımǵa, «Egemen Qazaqstan» respýblıkalyq gazeti» AQ basqarma tóraǵasy orynbasary - bas redaktor Aıbyn Shaǵalaqovqa, «Astana aqshamy» gazetiniń bas redaktory Erkin Qydyrǵa, «QazAqparat» HAA bas dırektorynyń keńesshisi Qalamqas Ábýovaǵa tapsyryldy.
