Senat Tóraǵasy Atyraý oblysy máslıhattarynyń delegatsııasymen kezdesti
ASTANA. 20 maýsym. QazAqparat - Búgin Qazaqstan Respýblıkasy Parlamenti Senatynyń Tóraǵasy Qaırat Mámı Atyraý oblysy máslıhattarynyń hatshylarymen kezdesti.
Bul týraly QR Parlamenti Senatynyń baspasóz qyzmetinen habarlaıdy.
Q.Mámı elimiz Parlamentiniń qazirgi kezdegi zań shyǵarý qyzmeti týraly áńgimeledi. Atap aıtqanda, Prezıdent N.Á.Nazarbaevtyń «Qazaqstan - 2050» Strategııasy: qalyptasqan memlekettiń jańa saıası baǵyty» Joldaýynan týyndaıtyn zań jobalary týraly sóz boldy.
Kezdesý barysynda qabyldanatyn sheshimder úshin qajetti quqyqtar men resýrstardy ortalyqtan alyp, bıliktiń aımaqtyq organdaryna berýdi kózdeıtin basqarýdy ortalyqsyzdandyrýǵa basa nazar aýdaryldy. Bul rette, Parlament keıbir zańdarǵa jergilikti ózin-ózi basqarý jáne memlekettik basqarý organdary arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizýdi qarastyratyn zańdar qabyldady. Q.Mámı atap ótkendeı, osy zańdarǵa sáıkes, aýyldyq ákimderge qosymsha ókilettikter berilip, aýyl ahýalyna olardyń yqpaly kúsheıe túsetin bolady. Basqarýdyń tómengi deńgeıindegi ákimderdiń qarjylaı jáne ekonomıkalyq derbestigi keńeıedi.
Q.Mámı jurtshylyq arasynda ortalyqsyzdandyrý úderisteriniń máni men mańyzyn keńinen túsindirý qajettigin atap ótti.
Senat Tóraǵasy máslıhattardy jumyssyzdyqty qysqartý jáne kásipkerlikti qoldaý jónindegi baǵdarlamalardy iske asyrýǵa belsendi qatysýǵa shaqyrdy.
Astanada bolǵan kezde Atyraý oblysy máslıhattary hatshylarynyń delegatsııasy Qazaqstan Respýblıkasy Parlamenti Senatynyń janyndaǵy Jergilikti ókildi organdarmen (máslıhattar) ózara is-qımyl jónindegi keńes múshelerimen kezdesti.
