Senat tóraǵasynyń orynbasary jańa Konstıtýtsııa qabyldaý máselesin referendýmǵa shyǵarýdy usyndy
ASTANA. KAZINFORM – Parlament Senaty tóraǵasynyń orynbasary Olga Perepechına jańa Konstıtýtsııa qabyldaý máselesin referendýmǵa shyǵarýdy usyndy.
— Konstıtýtsııa jobasynda Quryltaıdy ishten uıymdastyrýǵa, onyń ishinde ondaǵy komıtetter men komıssııalardyń qyzmetine aıryqsha mán berilgen. Olardyń fýnktsııasyn Konstıtýtsııa deńgeıine shyǵarý Parlament júıesin bekemdeýde mańyzdy qadam bolady. Quryltaıdyń komıtetteri men komıssııalary zańdardy ázirlep, pysyqtaýda, sarapshylyq qorytyndy shyǵarýda, parlamenttik baqylaýda negizgi ról oınaıdy. Olardyń mártebesi men ókiletin Konstıtýtsııada aıqyn bekitý zań shyǵary protsesin ashyq ári sapaly etedi. Parlamenttiń bir palataly bolyp ózgerýine baılanysty Komıssııalardyń ókileti de ózgertiledi. 59-baptyń 1-tarmaǵy boıynsha, Quryltaı turaqty komıtetterdi qurady. Olardyń sany Konstıtýtsııalyq zań men komıssııalar arqyly aıqyndalady. 52-baptyń 4-tarmaǵynda Quryltaıdyń qyzmetin uıymdastyrý, ondaǵy depýtattardyń quqyqtyq mártebesi Konstıtýtsııalyq zańmen aıqyndalatyny belgilengen, — dedi depýtat.
Sondaı-aq, ol Konstıtýtsııanyń 59-babynyń 3-tarmaǵy boıynsha, Quryltaıdy uıymdastyrý máselesinde, turaqty komıtetterdiń sany men qyzmet baǵyttaryna baılanysty shekteý joq ekenin aıtty.
— Jańa Konstıtýtsııanyń jobasy ókildik bılikti kúsheıtip, azamattardyń senimin arttyrýǵa, kemel parlamenttik mádenıet qalyptastyrýǵa baǵyttalǵan. Azamattarymyzdyń Ata zań jobasyna degen belsendi qyzyǵýshylyǵyn eskere otyryp, Konstıtýtsııa qabyldaý máselesin jalpyhalyqtyq referendýmǵa shyǵarý týraly usynysqa qoldaý bildirgim keledi. Bul protsedýra halyq egemendigi qaǵıdatyna sáıkes keledi jáne qabyldanatyn sheshimniń aıryqsha mańyzdylyǵyn kórsetedi. Bul Konstıtýtsııa jobasyn qoldaý arqyly biz onyń iske asyrylatynyna jáne eldegi parlamenttik júıeniń ári qaraı da damıtynyna jaýapkershilik arqalaýǵa daıyn ekenimizdi rastaımyz, — dedi Olga Perepechına.
Aıta keteıik, Kazinform agenttiginiń qazaq jáne orys tilindegi Telegram arnasy osy otyrystan mátin translıatsııasyn berip jatyr.