Senat tóraǵasynyń qatysýymen ornyqty damý maqsattary jónindegi akselerator óz jumysyn bastady
ASTANA. KAZINFORM - Senat tóraǵasy Máýlen Áshimbaev jáne bir top senatordyń qatysýymen Palatanyń Jobalyq keńsesi, Maqsut Narikbayev University jáne Aqmola oblysynyń ákimdiginiń birlesken is-qımyly aıasynda BUU-nyń Ornyqty damý maqsattary jónindegi akselerator óz jumysyn bastady.
Palata Spıkeri óz sózinde Memleket basshysy ornyqty damý máselelerine únemi basa mán beretinin atap ótti. Búginde osy saladaǵy oń ózgeristerdi kózdeıtin júıeli sharalar júzege asyrylyp, jańa jobalar ázirlenip jatyr. Sonyń barysynda ODM-ǵa qol jetkizý baǵytyndaǵy birlesken is-qımyldyń tıimdi tetikteriniń biri retinde akselerator óz jumysyn bastap otyr. Onyń aıasynda jeti jobalyq-zertteý toby 100 kún boıy senator-kýratorlarmen birge «Myqty densaýlyq jáne ıgilik», «Sapaly bilim», «Laıyqty eńbek jáne ekonomıkalyq ósý», «Ornyqty qalalar men eldimekender» jáne «Beıbitshilik, ádildik jáne tártip» sııaqty ornyqty damý maqsattaryna qol jetkizý jolynda jumys isteıdi. Toptardyń jumysynyń nátıjesi Aqmola oblysynda pılottyq jobalar retinde iske asyrylatynyn atap ótken jón.
Máýlen Áshimbaev atap ótkendeı, sarapshylar komandasy osyndaı formatta jumys isteı otyryp, zańnamany jetildirý úshin áleýeti joǵary salalar men Ornyqty damý maqsattaryna qol jetkizý jolyndaǵy kedergilerdi anyqtaı alady.
«Prezıdentimizdiń tapsyrmasy boıynsha Parlamentte Ornyqty damý salasyndaǵy ulttyq maqsat-mindetterdiń iske asyrylýyna monıtorıng júrgizý jónindegi komıssııa quryldy. Óńirlermen birlesken is-árekettiń nátıjesinde akselerator óz jumysyn bastap otyr. Ol ornyqty damý maqsattaryn júzege asyrý aıasyndaǵy júıeli jumysty jalǵastyryp, tıimdi sheshimder ázirleýdiń mańyzdy tetigi bolady dep senemiz. Aldaǵy ýaqytta biz komandalardan mańyzdy máselelerdi sheshýge arnalǵan zań jobalary boıynsha tyń bastamalar, sondaı-aq, Ornyqty damý maqsattaryna qol jetkizý jáne óńirlerdi damytý jóninde naqty usynystar kútemiz», – dep, Máýlen Áshimbaev osy baǵytta birlesip belsendi jumys istep kele jatqan sarapshylarǵa alǵys bildirdi.
Aıta keteıik, akselerator komandalarynyń quramyna Senat janyndaǵy Jas sarapshylar klýbynyń músheleri, Taldaý mektebiniń túlekteri, Maqsut Narikbayev University-diń ǵalymdary jáne shaqyrylǵan sarapshylar endi.