Máýlen Áshimbaev parlamenttik reforma týraly pikir bildirdi

ASTANA. KAZINFORM — Reforma aıasynda jańarǵan Parlamenttiń spıkeri qyzmetine Máýlen Áshimbaev úmitker bola ala ma? Bul suraqqa Senat tóraǵasynyń ózi jaýap berdi.

Senattyń jalpy otyrysynan keıin tilshiler suraǵyna jaýap berý kezinde M. Áshimbaev bul jaıynda aıtý áli erte ekenin atap ótti.

— Dál qazir ony tek talqylaý júrip jatyr. Alda 2026-2028 jyldar bar. Sondyqtan qandaı da bir málimdeme jasaýǵa áli erte dep oılaımyn. Dál qazir men aldymyzda turǵan mindetterge erekshe mán berip otyrmyn. Bizdiń maqsatymyz — osy jyldyń aıaǵyna deıin negizgi zańdardy qabyldaý. Bul zańdarǵa jaýaptymyz. Atap aıtqanda, osy jaıyndaǵy qaýesettiń barlyǵy spekýlıatsııa dep bilemin. Qazir jeke óz basym jáne depýtattardyń barlyǵy mańyzdy zańdardy qabyldaýǵa kúsh-jigerin salyp jatyr, — dedi M. Áshimbaev.

Aıta keteıik, 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady. 

Joldaý kezinde Prezıdent bir palataly Parlament qurý týraly bastama kóterdi.