Senat tóraǵasy Ulttyq qor týrasynda: Halyq qarajattyń jumsalýyn qadaǵalap otyr
ASTANA. KAZINFORM – Senat spıkeri Máýlen Áshimbaev Ulttyq qordyń salynǵan qarajatynan oblıgatsııalyq zaemdarǵa túsetin syıaqy túrindegi túsimderdiń qanshalyqty tıimdi ekenine nazar aýdardy.
Atap aıtqanda, bul másele Senattyń jalpy otyrysynda Úkimettiń jáne Joǵary aýdıtorlyq palatanyń 2023 jylǵy bıýdjettiń atqarylýy týraly esepterin qaraý barysynda kóterildi.
Máýlen Áshimbaev «Ulttyq qor – balalarǵa» baǵdarlamasy júzege asyryla bastaǵaly beri Qor qarajatynyń jumsalýyna halyqtyń nazary kúrt artqanyn aıtty. Qazir Ulttyq qordyń salynǵan qarajatynan otandyq kompanııalardyń oblıgatsııalyq zaemdaryna túsetin syıaqy túrindegi túsimderdiń mólsheri tómen deńgeıde. Osyǵan baılanysty balamaly tetikterge qajettilik artyp keledi.
«Ulttyq qordy ártúrli tetikter arqyly belsendi paıdalanýymyz qanshalyqty durys: kepildi transfert, nysanaly transfert, kvazımemlekettik sektordyń oblıgatsııalaryn satyp alý – bul bıýdjetten tys qarjylandyrý. Parlamenttiń buǵan qatysy joq ekenin atap ótkim keledi. Endi bizdiń flagmandyq kompanııalardyń aktsııalaryn Ulttyq qorǵa satý sııaqty tetik paıda boldy. Bul rette shaǵyn paket emes, QazMunaıGaz-ǵa qatysty jaǵdaı sııaqty óte iri kólemde – 20 paıyz. Osyndaı birneshe tetik paıda boldy jáne olardy Úkimet sońǵy jyldarda belsendi qoldanyp otyr. Oblıgatsııalar da jaman emes. Biraq mundaı oblıgatsııalardyń shyǵyn ekenin kórip otyrmyz. Basqalary boıynsha kýponnyń az paıyzdary bar. Árıne, bul zańdy tetik bolýy múmkin. Degenmen, kvazımemlekettik sektordy osylaı qarjylandyrý saldarynan Ulttyq qor balamaly tetikter arqyly alýǵa bolatyn qarajatty tıisti deńgeıde ala almaıdy», – dedi Senat tóraǵasy.
Sonymen qatar palata spıkeri bul aktsııalar satylǵan jaǵdaıda qanshalyqty ótimdi bolatyny da kúmándi ekenin tilge tıek etti. Sondyqtan Qor portfeliniń barynsha ártaraptandyrylýyn, paıdaly bolýyn jáne ótimdiligin qamtamasyz etý qajet.
«QazMunaıGazdyń 20 paıyzdyq paketi. Iá, zańdy tetik. Biraq osy rette Ulttyq qordyń portfeli qanshalyqty ártaraptandyrylǵan degen saýal týyndaıdy. Ulttyq qordyń qarajatyn paıdalanýdyń máni – bir aktıvke birden birneshe mıllıard ınvestıtsııa salmaı, ony ártaraptandyrý, ártúrli aktıvterge salý. Árıne, QazMunaıGaz – turaqty kompanııa. Ol boıynsha problema bolmaıdy dep oılaımyz. Biraq, báribir bul derbes qordyń qarajatyn ınvestıtsııalaý prıntsıpin buzady. Ekinshiden, bul aktsııalardyń ótimdiligine qatysty da máseleler bar. Ulttyq qor olardy satqysy kelse de sata almaıdy. Eshkim olardy satqyzbaıdy. Osyǵan baılanysty Ulttyq qor ınvestıtsııalaryndaǵy ótimdilik qaǵıdaty taǵy buzylady. Sondyqtan mundaı úlken paketti Ulttyq qorda ustaý qısynsyz. Osy máseleni tıimdi sheshý qajet», – dedi Máýlen Áshimbaev.
