Senat tóraǵasy transshekaralyq ózender problemasy týraly: Halyq naqty nátıjelerdi kórýi kerek

ASTANA. KAZINFORM - Bul jóninde Senat Spıkeri Máýlen Áshimbaev Palata otyrysynda aıtty.

Otyrys barysynda depýtattar Jaıyq ózeniniń ekologııalyq ahýaly jáne ondaǵy sý aǵynynyń azaıýyna qatysty máseleni kóterip, Sý resýrstary jáne ırrıgatsııa birinshi vıtse-mınıstri Bolat Beknııazǵa saýal qoıǵan edi. Osyǵan oraı Palata Tóraǵasy bul baǵytta Memleket basshysy júktegen naqty mindetter bar ekenin nazarǵa alyp, tıisti vedomstvony belsendilik tanytýǵa shaqyrdy.

«Prezıdentimiz Qasym-Jomart Kemeluly Toqaev Jaıyq ózenine qatysty naqty tapsyrmalar bergeni belgili. Sondyqtan osy baǵyttaǵy jumystardy Reseımen dáıekti jáne tabandy túrde jalǵastyrý kerek. Halyq júzege asyrylyp jatqan sharalardyń naqty nátıjelerin kórýi qajet. Aldaǵy ýaqytta osy baǵyttarda naqty ári júıeli jumys júrgizesizder dep senemiz», – dedi Máýlen Áshimbaev.

Aıta keteıik, búgin Senat otyrysynda depýtattar «Halyqaralyq sý aǵyndaryn keme qatynasynan basqasha paıdalaný túrleriniń quqyǵy týraly konventsııany ratıfıkatsııalaý týraly» zańdy qarap, maquldady. Zańnyń normalaryna sáıkes memleketter óz aýmaǵynda halyqaralyq sý aǵynyn paıdalanǵan kezde basqa elderge zalal keltirýdiń aldyn alý úshin tıisti sharalar qabyldaýǵa mindettenedi.

Osyǵan deıin Senat transshekaralyq ózenderdi halyqaralyq negizde paıdalaný qujatyn bekitkenin jazdyq.