Senat tóraǵasy Reseıdiń qatysýymen Qazaqstanda salynatyn jylý elektr ortalyqtaryna qatysty pikir bildirdi

Senat tóraǵasy Máýlen Áshimbaev Reseıdiń qatysýymen Qazaqstanda salynatyn úsh jylý elektr ortalyǵyna qatysty pikir bildirdi, dep habarlaıdy Kazinform. 

Senat tóraǵasy Reseı Qazaqstannyń strategııalyq seriktesi ekenin aıta kele: «eki el arasynda tyǵyz ekonomıkalyq qatynas ornaǵan jáne birqatar birlesken ekonomıkalyq jobalar bar. Qazir elimiz úshin kúrdeli máselelerdiń biri – ınfraqurylymdy jańǵyrtý. Halyqty jylýmen jáne ystyq sýmen qamtamasyz etý júıesin jańǵyrtý kerek. Byltyr qysta bul baǵyttaǵy kúrdeli problemany baıqadyńyzdar, ıaǵnı osy másele tek Pavlodar oblysynda ǵana bolǵan joq. Elimizdiń óńirlerindegi jylý elektr stantsııalary negizinen keńestik kezeńde salynǵan. Sondyqtan olardyń eskirgenin eskerý kerek», - dedi.

Sonymen qatar ol qazir elimizde barlyq jylý elektr stantsııalary men ınjenerlik ınfraqurylymdy jańǵyrtý jumystary bastalǵanyn aıtty.

«Buǵan memleket qyrýar qarajat jumsaýy tıis. Árıne, múmkindiginshe respýblıkalyq bıýdjetten qarjy bólip jatyrmyz, biraq bul qarajat jetkiliksiz. Bizge jylý elektr ortalyqtaryn jańǵyrtý úshin qarajat salatyn ınvestorlar qajet. Barsha elimizdiń aýmaǵyndaǵy jylý elektr ortalyqtaryn jańǵyrtý mindeti tur. Atap aıtqanda, aldaǵy ýaqytta atqarylatyn jalpy jumys aýqymynda salynatyn úsh jylý elektr ortalyǵy (Reseıdiń qatysymen salynatyn) shamaly ǵana bir bóligin qurap tur», - dedi M. Áshimbaev.

Budan buryn habarlanǵandaı, jaqynda Qazaqstan men Reseıdiń XIX Óńiraralyq yntymaqtastyq forýmynda Reseıdiń qatysýymen Qazaqstanda 3 jylý elektr ortalyǵy salynatyny málim boldy.

Bul rette, Qazaqstan men Reseı Energetıka mınıstrlikteri arasynda Kókshetaý, Semeı jáne Óskemen jylý elektr ortalyqtaryn salý jobalary boıynsha yntymaqtastyq jónindegi ózara túsinistik memorandýmyna qol qoıyldy.