Senat Tóraǵasy: Referendým – Prezıdenttiń saıası baǵdaryn iske asyrýdyń tarıhı kezeńi
TALDYQORǴAN.KAZINFORM - Jańa Konstıtýtsııa aýyl ómirin jaqsartýǵa, sondaı-aq azyq-túlik qaýipsizdigi, ınklıýzııa jáne etnosaralyq kelisimniń ózekti máselelerin sheshýge qalaı kómektese alady? Senat Tóraǵasy Máýlen Áshimbaev búgin Jetisý oblysynyń fermerlerimen osy taqyryptaǵy ózekti máselelerdi talqylady.
– Prezıdentimiz Qasym-Jomart Toqaev aýyl sharýashylyǵyn qarqyndy damytýǵa únemi basa mán berip keledi. Eldiń ál-aýqaty osy saladaǵy tabyspen tyǵyz baılanysty. Bul baǵyttaǵy ilgerileý aýyldardyń, óńirlerdiń, jalpy, tutas eldiń damýyna serpin beredi. Búginde osy jáne basqa da salalarda júıeli jańǵyrtý júrgizilip jatyr. Usynylyp otyrǵan ózgerister Qazaqstannyń turaqty damýyna, azamattardyń ómir súrý sapasyn arttyrýǵa jáne búgingi ári keler urpaqtyń ál-aýqatyn qamtamasyz etýge baǵyttalǵan. Jetisý oblysy – elimizdiń mańyzdy aýylsharýashylyq, ındýstrııalyq, ǵylymı jáne ekonomıkalyq ortalyqtarynyń biri. Búginde óńirdegi kásiporyndar osy ıgi dástúrdi jalǵastyryp, ósim men ınnovatsııanyń naqty draıverine aınalyp keledi, – dedi Senat Tóraǵasy.
Máýlen Áshimbaev máslıhat depýtattarymen jáne óńirdegi Qazaqstan halqy Assambleıasynyń ókilderimen kezdesý barysynda elimizdi ornyqty damytý, demokratııalyq qaǵıdattardy nyǵaıtý, saıası júıeni keshendi jańartý úshin konstıtýtsııalyq reformanyń strategııalyq jáne tarıhı mańyzy zor ekenin atap ótti.
– Jańa Konstıtýtsııa jobasyna baılanysty respýblıkalyq referendým – Prezıdentimiz Qasym-Jomart Toqaevtyń eldi aýqymdy ári júıeli jańǵyrtý baǵdaryn iske asyrý jolyndaǵy tarıhı kezeń. Elimizdiń bolashaǵyna qatysty mańyzdy sheshimderdi azamattardyń tańdaýyna súıene otyryp qabyldaý demokratııa qaǵıdattaryna adaldyqtyń aıqyn kórinisi ekeni anyq. Konstıtýtsııalyq reformanyń basym mindeti – Táýelsizdikti nyǵaıtý jáne azamattardyń ál-aýqatyn arttyrý. Osyǵan baılanysty jańa Konstıtýtsııa jobasynda zań ústemdigi men quqyqtyq tártipti kúsheıtýge, azamattardyń quqyqtary men múddelerin qorǵaýǵa, sondaı-aq, eldiń ornyqty damýyna basymdyq berilgen, – dedi Máýlen Áshimbaev.
Senat delegatsııasy sonymen qatar «Asar» sporttyq-ońaltý kesheniniń qyzmetkerlerimen jáne ónerkásip akkýmýlıatorlaryn shyǵaratyn zaýyttyń jumysshylarymen áńgimelesti.
