Senat Tóraǵasy Ortalyq Azııa memleketteriniń II Parlamentaralyq forýmyna qatysty
ASTANA. KAZINFORM — Senat Tóraǵasy Máýlen Áshimbaev bastaǵan Qazaqstan Parlamentiniń delegatsııasy Ortalyq Azııa memleketteriniń II Parlamentaralyq forýmyna qatysty. Іs-shara «Óńirdiń áleýmettik-ekonomıkalyq damýyndaǵy Ortalyq Azııa Parlamenti men ókildi bılik organdarynyń róli» taqyrybyna arnaldy. Sondaı-aq Palata Spıkeri Ortalyq Azııa elderi Parlamenti Palatalarynyń basshylarymen ekijaqty kezdesýler ótkizip, óńirdegi yntymaqtastyqty nyǵaıtýǵa qatysty ózekti máselelerdi talqylady.
Máýlen Áshimbaev Forýmǵa qatysýshylarǵa iltıpat bildirip, óńirdiń jalpy kún tártibin talqylaý, ortaq maqsattar men mindetterdi aıqyndaý jáne oǵan birlesip qol jetkizý baǵytynda mundaı alańnyń mańyzy zor ekenin atap ótti.
«Qazaqstan Prezıdenti Qasym-Jomart Kemeluly Toqaev baýyrlas elderimiz arasynda tıimdi dıalogty damytýǵa jáne syndarly ózara baılanysty arttyrýǵa únemi basa mán berip keledi. Búgingi kezdesý búkil óńirdiń áleýmettik-ekonomıkalyq damýy jolynda parlamenttik dıplomatııanyń áleýetin paıdalana otyryp, ózara dıalogty nyǵaıtýǵa yqpal etetini anyq. Byltyr aqpan aıynda Túrkistanda ótken alǵashqy Forýmnan keıin biz yntymaqtastyǵymyzdy arttyrý isinde aıtarlyqtaı jetistikterge qol jetkizdik. Túrkistan deklaratsııasy parlamentaralyq baılanystardy nyǵaıtýdyń berik negizin qalap, ózara qarym-qatynasymyzdy odan ári damytýdyń negizgi baǵyttaryn aıqyndap berdi. Sonyń aıasynda biz ekijaqty saparlardy jandandyryp, óńirdegi kópjaqty ózara is-qımyldyń jańa tetikterin iske qostyq. Hıýadaǵy búgingi Forým da parlamentaralyq yntymaqtastyqty nyǵaıtýǵa tyń serpin beredi dep senemin», – dedi Senat Tóraǵasy.
Sonymen qatar Máýlen Áshimbaev qazirgi tańda jańa syn-qaterlerdi birlesip eńserýdiń mańyzdy ekenine nazar aýdardy. Naqty aıtqanda, ol kezdesýge qatysýshylardy óńirdiń ekonomıkalyq ósýi, Ornyqty damý maqsattaryn iske asyrý jáne adam kapıtalyn damytý jolynda kúsh jumyldyrýǵa shaqyrdy. Palata Tóraǵasy óńirdi damytýdyń mańyzyna da nazar aýdaryp, jergilikti ókildi organdar deńgeıinde, sondaı-aq, tsıfrlandyrý jáne jasandy ıntellekt salasynda yntymaqtastyqty keńeıtý qajet ekenin atap ótti.
«Damýdyń ıntegratsııalanǵan modelin qalyptastyrý – barshamyz úshin ortaq mindet. Bul joldaǵy basty maqsatymyz Ortalyq Azııa turǵyndarynyń ómir súrý deńgeıin arttyrý ekeni sózsiz. Osyǵan baılanysty birlesken jumysymyzdy birneshe baǵytta jalǵastyrýdyń mańyzy zor dep esepteımin. Birinshi – ekonomıkalyq damý jáne yntymaqtastyq. Ortaq ekonomıkalyq keńistikti damytý, saýda-sattyqty keńeıtý jáne ónerkásip kooperatsııasyn kúsheıtý úshin quqyqtyq baza qalyptastyrý isin jalǵastyrýdyń bereri mol. Ekinshi – Birikken Ulttar Uıymynyń Ornyqty damý maqsattaryn iske asyrý. Sý resýrstaryn tıimdi paıdalaný – óńirdegi barlyq el úshin ózekti másele. Bul rette biz gıdroenergetıkalyq nysandardy birlesip salý jáne sý-energetıkalyq konsortsıýmyn qurý jónindegi bastamalardy qoldaımyz. Úshinshi – adam kapıtalyn damytý. Atalǵan baǵyt – memleketterimizdiń basshylary maquldaǵan Óńirlik yntymaqtastyqty damytý jónindegi jol kartasynda aıqyndalǵan basym mindetterdiń biri. Tórtinshi – jergilikti ókildi organdar deńgeıinde ózara is-qımyldy keńeıtý. Besinshi – tsıfrlandyrý jáne jasandy ıntellektti damytý salasyndaǵy yntymaqtastyqty arttyrý», – dedi Máýlen Áshimbaev.
Sondaı-aq Forýmnyń ashylýynda Ózbekstan Olıı Májilisi Senatynyń Tóraǵasy Tanzıla Narbaeva, Qyrǵyzstan Jogorký Keneshiniń Tóraǵasy Nurlanbek Shakıev, Tájikstan Madjlısı namoıandagon Madjlısı Olı Tóraǵasy Mahmadtoır Zokırzoda, Túrikmenstan Medjlısi Ekonomıkalyq máseleler jónindegi komıtetiniń Tóraǵasy Gývanchmyrat Agaev jáne BUU Bas hatshysynyń Ortalyq Azııa boıynsha arnaıy ókili Kaha Imnadze sóz sóıledi.
Іs-shara aıasynda túrli taqyryptarǵa arnalǵan paneldik sessııalar da ótti. Onda qatysýshylar parlamentaralyq komıssııalar men dostyq toptarynyń qyzmetin odan ári jandandyrý, óńirlerdi damytý baǵdarlamalarynyń iske asyrylýyn baqylaý maqsatymen jergilikti jerlerde ókildi bılik organdarynyń ózara is-qımylyn keńeıtý jáne negizgi áleýmettik-ekonomıkalyq máselelerdi sheshýge Parlamentterdegi áıel depýtattar men jastardyń qatysýyn arttyrý máselelerin talqylady. Paneldik sessııalarǵa Qazaqstan Parlamenti Senaty Tóraǵasynyń orynbasary Jaqyp Asanov, Senat depýtattary Álı Bektaev, Darhan Qydyráli, Aıgúl Qapbarova, Álisher Satvaldıev, Májilis depýtaty Aına Mysyrálimova jáne Aqtóbe oblystyq máslıhatynyń tóraǵasy Gúlqasıma Súıintaeva qatysty. Sondaı-aq Forým kezinde Ortalyq Azııa elderi Parlamentteri Apparattary basshylarynyń birinshi otyrysy ótti. Oǵan elimizdiń atynan Qazaqstan Parlamenti Senaty Apparatynyń basshysy Maksım Spotkaı qatysty.
Máýlen Áshimbaev Forým alańynda Ózbekstan Respýblıkasy Olıı Májilisi Senatynyń Tóraǵasy Tanzıla Narbaevamen kezdesti. Suhbat kezinde parlamentaralyq yntymaqtastyqty keńeıtý, ónerkásip, tranzıttik-kólik ınfraqurylymy, saýda jáne energetıka salasyndaǵy kooperatsııalyq baılanystardy damytý máseleleri talqylandy. Taraptar álemde qalyptasqan qazirgi ahýal men jańa syn-qaterlerdi eskere otyryp, eki memlekettiń sý-energetıkalyq qaýipsizdigin qamtamasyz etý baǵytyndaǵy keshendi ózara is-qımyl máselelerine de toqtaldy.
Sonymen birge Máýlen Áshimbaev Qyrǵyzstan Jogorký Keneshiniń Tóraǵasy Nurlanbek Shákıevpen kezdesti. Onda ortaq ózekti máselelerge mán berildi. Atap aıtqanda, tsıfrlandyrýdy, ınvestıtsııalyq yntymaqtastyqty, sý-energetıka salasyndaǵy jáne halyqaralyq uıymdar aıasyndaǵy ózara is-qımyldy damytý týraly sóz boldy.
Óz kezeginde baýyrlas elder Parlamentteri Palatalarynyń basshylary Qazaqstanmen yntymaqtastyq dınamıkasyn joǵary baǵalady. Olar Ortalyq Azııa elderi Parlamentteri depýtattarynyń birlesken syndarly jumysy strategııalyq ózara is-qımyldy nyǵaıtýǵa oń yqpalyn tıgizetinine senim bildirdi.
