Senat tóraǵasy órt sóndirýshilerdiń ókilettigin keńeıtýge qatysty pikir aıtty
ASTANA. KAZINFORM – Senat tóraǵasy Máýlen Áshimbaev elordadaǵy páter órtinen keıin qutqarýshylardyń ókilettigin keńeıtý usynysyna qatysty pikir aıtty.
- Tótenshe jaǵdaılarda tıisti qyzmetterdiń óz mindetterin kedergisiz atqarýyn qamtamasyz etetin tetikter qajet. Álbette, bul turǵyda belgili bir erekshe jaǵdaılar, bótenniń múlkine qatysty másele bar. Biraq adamdardyń ómiri men qaýipsizdigine qatysty bolsa, olardyń fýnktsııalaryn kedergisiz oryndaýǵa múmkindik beretin tetikter bolýy kerek, - dedi M. Áshimbaev Senatta tilshiler suraǵyna jaýap bere otyryp.
Bul turǵyda Senat tóraǵasy zańnamaǵa tıisti ózgerister engizýdi qarastyratyn normalardy tyńǵylyqty pysyqtaý qajet ekenin aıtty.
Aıta keteıik, Astanadaǵy turǵyn úı kesheninde órtten zardap shekken áıeldiń jaǵdaıy aýyr ekenin jazǵanbyz.
12 sáýirge qaraǵan túni Túrkistan kóshesinde ornalasqan 21 qabatty turǵyn úıdiń 15-qabatyndaǵy páterden órt shyqqan. Oqıǵa kezinde páter ishinde bir otbasy bolǵan. Órt saldarynan úsh bala mert bolyp, olardyń anasy aýyr jaraqatpen aýrýhanaǵa jetkizildi.
Osy órt kezinde jol júrisi qaǵıdalaryn buza otyryp turaqqa qoıylǵan avtokólik jedel túrde oqıǵa ornynan alynyp tastaldy.
Astana Polıtsııa departamenti málimetinshe, kólik júrgizýshisi anyqtalyp, oǵan qatysty ákimshilik sharalar qoldanyldy.
