Senat tóraǵasy men Eýropa Keńesi Parlamenttik Assambleıasynyń Prezıdenti birlesken málimdeme jasady

ASTANA. KAZINFORM – Málimdemeniń mátinin QR Parlament Senatynyń baspasóz qyzmeti taratty.

- Búgin Eýropa Keńesiniń Parlamenttik Assambleıasy Qazaqstandaǵy demokratııalyq reformalardy qoldaýdy rastaıtyn qarar qabyldaǵan kezde, biz 2004 jyly qol qoıylǵan mekemelerimiz arasyndaǵy Yntymaqtastyq týraly kelisimde kózdelgendeı, parlamentaralyq yntymaqtastyqty nyǵaıtýǵa, ınstıtýtsıonaldyq jáne saıası dıalogty tereńdetýge jáne ortaq qundylyqtar negizinde progresti ilgeriletýge óz mindettemelerimizdi qaıta jarııalaımyz,- delingen málimdemede.

Sondaı-aq onda bıyl Qazaqstan Respýblıkasy Konstıtýtsııasynyń 30 jyldyǵyn atap ótip, demokratııa, quqyq ústemdigi jáne adam quqyqtary ınklıýzıvti, gúldengen jáne úılesimdi qoǵamnyń negizi bolyp tabylatynyn atap ótetinimiz aıtylady.

Qazaqstannyń konstıtýtsııalyq jáne saıası reformalar arqyly óziniń demokratııalyq ınstıtýttaryn nyǵaıtýdaǵy eleýli kúsh-jigerin, sondaı-aq onyń Eýropa Keńesimen, atap aıtqanda onyń Parlamenttik Assambleıasymen jáne basqa da halyqaralyq áriptesterimen belsendi yntymaqtastyǵyn joǵary baǵalaımyz.

- Biz Qazaqstannyń ólim jazasyn alyp tastaýyn jáne onyń azamattyq jáne saıası quqyqtar týraly halyqaralyq paktige ekinshi Fakýltatıvtik hattamany ratıfıkatsııalaýyn quptaımyz, bul adam quqyqtaryn qorǵaýǵa beıildiligin kórsetedi. Biz Qazaqstannyń Eýropa Keńesiniń tıisti konventsııalaryna qosylý jónindegi kúsh-jigerin qoldaımyz jáne adam quqyqtaryn, quqyq ústemdigi men demokratııany ilgeriletýge degen birlesken umtylysymyzdy baǵalaımyz, - delingen qujatta.

Aıta keteıik, Memleket basshysy Qasym-Jomart Toqaev bıylǵy Joldaýynda bir palataly Parlament qurý týraly bastama kóterdi.