Senat tóraǵasy Máýlen Áshimbaev referendýmda daýys berdi

ASTANA. KAZINFORM –Senat tóraǵasy Máýlen Áshimbaev jańa Konstıtýtsııa boıynsha ótip jatqan jalpyhalyqtyq referendýmda daýys berdi. Ol óz tańdaýyn elordadaǵy Ulttyq akademııalyq kitaphanadaǵy № 129 ýchaskede jasady.

Búgin – elimiz úshin asa mańyzdy ári jaýapty kún. Búkilhalyqtyq referendýmda memleketimizdiń jańa Konstıtýtsııasyna qatysty másele qaralyp jatyr. Konstıtýtsııada bıliktiń qaınar kózi – halyq ekeni naqty jazylǵan. Sondyqtan búgin azamattarymyzdyń óz quqyqtaryn iske asyryp, eldiń strategııalyq damý baǵytyn aıqyndaýǵa qatysýyna múmkindik bar.

– Referendým – Prezıdent usynǵan «estıtin memleket» qaǵıdatyn júzege asyrýdyń bir kórinisi. Bul qaǵıdat aıasynda barlyq mańyzdy sheshim qoǵammen talqylanyp, azamattardyń pikiri eskeriledi. Osy kúni qazaqstandyqtardyń azamattyq belsendilik tanytyp, referendýmǵa qatysyp, daýys berýi óte mańyzdy. Óıtkeni elimizdiń bolashaǵyna qatysty mańyzdy sheshimder qabyldanǵanda eshkim shet qalmaýy tıis. Árbir daýys mańyzdy, árbir daýys qundy. Bul azamattyq belsendiliktiń kórsetkishi, – dedi Máýlen Áshimbaev.

Ol sondaı-aq jańa Konstıtýtsııa jobasy qabyldanǵan jaǵdaıda zańnama talaptary qatań saqtalatynyn atap ótti.

– Biz eń aldymen elimizdiń zańnamasyn buzbaýymyz kerek. Eger búgin azamattar jańa Konstıtýtsııa jobasyn qoldasa, onda onyń barlyq normalaryna sáıkes tıisti sharalar qabyldanady. Onyń ishinde Parlamentke jáne basqa da máselelerge qatysty. Sondyqtan aldaǵy ózgerister týraly naqty talqylaýlar referendým aıaqtalǵannan keıin júrgiziledi, – dedi Senat tóraǵasy.

Sonymen qatar ol ótpeli kezeńniń tártibine de toqtaldy.

– Eger referendým qorytyndysy boıynsha azamattar jańa Konstıtýtsııany qoldasa, ol bıylǵy 1 shildeden bastap kúshine enedi. Osy ýaqytqa deıin qoldanystaǵy zańnama tolyq kólemde áreket etedi, ıaǵnı barlyq norma burynǵy tártippen saqtalady. Al 1 shildeden bastap jańa Konstıtýtsııa kúshine engen jaǵdaıda, onda kózdelgen barlyq qajetti sheshim qabyldanady, – dedi Máýlen Áshimbaev.

Búǵan deıin QR Parlament Májilisiniń tóraǵasy Erlan Qoshanov jańa Konstıtýtsııa boıynsha ótip jatqan jalpyhalyqtyq referendýmda daýys berdi.

Sonymen qatar Memlekettik keńesshi referendýmda osy talqylaýlardyń nátıjesi aıqyndalatynyn atap ótti. Onyń aıtýynsha, búgin Qazaqstan azamattary el bolashaǵyna qatysty sheshim qabyldaıdy.

- Qabyldanatyn sheshimge sáıkes, qandaı qoǵamda ómir súretinimizdi jáne qandaı qundylyqtar negizinde ári qaraı damıtynymyzdy aıqyndaımyz. Meniń oıymsha, búgin mańyzdy sheshim qabyldanady, -  dedi ol.

Qazaqstan Respýblıkasy Ulttyq olımpıada komıtetiniń prezıdenti, «World Boxing» uıymynyń prezıdenti Gennadıı Golovkın referendýmda daýys berdi. Bul týraly Syrtqy ister mınıstrligi málimdedi.