Senat tóraǵasy: Máslıhattarmen ózara is-qımyldy jańa deńgeıge shyǵarý - mańyzdy mindet
ASTANA. KAZINFORM — Senat spıkeri Máýlen Áshimbaevtyń tóraǵalyǵymen palata janyndaǵy Jergilikti ókildi organdarmen ózara is-qımyl jasaý jónindegi keńestiń otyrysy ótti. Іs-sharaǵa senatorlar, memlekettik organdardyń basshylyǵy jáne onlaın-formatta elimizdiń barlyq óńirindegi máslıhat depýtattary qatysty.
Óz sózinde Senat tóraǵasy keńestiń buǵan deıingi otyrysynda belgilengen mindetter boıynsha atqarylǵan ister jóninde aıtty, jáne aldaǵy birlesken jumysty tıimdi júzege asyrýdyń naqty tetikterine toqtaldy. Atap aıtqanda, zań shyǵarý qyzmetimen birge óńirlerdegi problemalardy birlesip sheshý, jergilikti memlekettik basqarý jáne ózin-ózi basqarý júıesin damytý, zańdardyń aımaqtarda oryndalý barysyn baqylaý, sondaı-aq, máslıhattarǵa metodıkalyq jáne materıaldyq-tehnıkalyq qoldaý kórsetý baǵyttary boıynsha Senat pen jergilikti ókildi organdar arasyndaǵy ózara is-qımyldy nátıjeli júzege asyrý máseleleri sóz boldy.
Máýlen Áshimbaev bul iste Memleket basshysy Joldaýda belgilep bergen ekonomıkalyq saıasattyń jańa úlgisine kóshý máselesine qatysty mindetterdiń mańyzdy ekenine nazar aýdardy.
«Prezıdentimiz ekonomıkanyń jańa salalaryn damytý boıynsha naqty mindetter júktedi. Áleýmettik jáne ınjenerlik ınfraqurylymdy jańǵyrtý baǵytyna da úlken kóńil bólinip otyr. Halyqtyń ál-aýqatyn arttyrýdy kózdeıtin keshendi is-sharalar da júzege asyrylyp keledi. Eldiń ıgiligine arnalǵan osy baǵyttarda birlesip, nátıjeli jumys isteýimiz qajet. Memleket basshysynyń tapsyrmalaryna sáıkes, bıyl Parlament birqatar zańdar qabyldaıdy. Olardyń qatarynda jańa Salyq, Bıýdjet, Qala qurylysy, Sý kodeksteri bar. Bul zań jobalary boıynsha, ásirese óńirlerge qatysty máselelerde, máslıhat depýtattarynyń usynystaryn nazarǵa alýdyń mańyzy zor», – dedi Máýlen Áshimbaev.
Sonymen qatar palata spıkeri bıyl elimizde máslıhattardyń qurylǵanyna 30 jyl tolatynyn atap ótti.
Keńes otyrysynyń qorytyndysy boıynsha zań shyǵarý qyzmetinde jáne basqa da mańyzdy baǵyttarda barlyq deńgeıdegi depýtattardyń kúsh-jigerin biriktirip, birlesken jumysty odan ári jandandyrýdyń mańyzdy ekeni aıtyldy.
Іs-shara barysynda Jergilikti ókildi organdarmen ózara is-qımyl jasaý jónindegi keńes tóraǵasynyń orynbasary Tóleýbek Muqashev, óńirlerdiń máslıhat depýtattary Vladımır Býbenko, Erlan Kanalımov, Gúlqasıma Súıintaeva, Naýryzbaı Baıqadamov jáne taǵy basqalary sóz sóılep, ózara is-qımyldyń tıimdiligin arttyrý jóninde usynys-pikirlerin bildirdi.
