Senat tóraǵasy Qytaıdyń sarapshylar qaýymdastyǵy ókilderimen kezdesti
ASTANA. KAZINFORM – Qazaqstan parlamenttik delegatsııasynyń sarapshylar qaýymdastyǵy ókilderimen jáne Qytaıda bilim alyp jatqan Qazaqstan stýdentterimen kezdesýinde yntymaqtastyqtyń jańa formaty men tetikteri talqylandy.
Máýlen Áshimbaevtyń aıtýynsha, jasampaz yntymaqtastyq jáne eki eldiń múddelerin ózara qurmetteý birlesken jobalar úshin jańa múmkindikterge jol ashyp, mańyzdy máselelerdiń sheshimin tabýǵa yqpal etedi.
– Sońǵy jyldarda Qazaqstan ózekti jahandyq jáne óńirlik problemalardy jeńildetip, olardy sheshý úshin syndarly ózara is-qımyl men yntymaqtastyq saıasatyn belsendi ilgeriletip keledi. Qazaqstan óziniń syrtqy saıası qaǵıdalaryna, naqty aıtqanda, kópvektorlyqqa, pragmatızmge, basqa elderdiń múddelerin qurmetteýge jáne halyqaralyq problemalardy sheshýdiń syndarly joldaryn izdeýge adal bolyp qala beredi. Mundaı teńgerimdi ustanym bizdiń elimizge jahandyq syn-qaterlerge beıimdelip qana qoımaı, jańa álemdik tártip qalyptastyrý isine úles qosýǵa múmkindik beredi. Qazaqstan Ortalyq Azııa óńirindegi jasampaz yntymaqtastyq saıasatyn da dáıekti túrde dáriptep otyr. Memleket basshysy Qasym-Jomart Kemeluly Toqaev tyǵyz óńirlik kooperatsııany nyǵaıtýdyń mańyzdy ekenin birneshe ret atap ótti. Mundaı qadam óńirdiń damýyna jaǵdaı jasap qana qoımaı, búkil Ortalyq Azııanyń halyqaralyq qatynastardaǵy sýbektıvtiligin arttyrýǵa yqpal etedi, – dedi Senat Tóraǵasy.
Fýdan ýnıversıteti halyqaralyq zertteýler ınstıtýtynyń professory Chjao Hýashen Qazaqstan Ortalyq Azııadaǵy eń iri ekonomıka retinde Qytaıdyń negizgi saýda seriktesi ekenin atap ótti. Bul Qazaqstan-Qytaı qarym-qatynasynyń mańyzyn jáne ekijaqty yntymaqtastyqty odan ári damytýdyń tikeleı jáne áleýetti múmkindikterin kórsetedi.
– Eki eldiń ekonomıkasy bir-birin tolyqtyrady. Qazirgi ýaqytta biz IT jáne tsıfrlyq ekonomıka, ındýstrııalyq jańǵyrtý jáne basqa da joǵary tehnologııalyq salalarda yntymaqtastyq ornatyp jatyrmyz. Bul endi tek dástúrli saýda emes, Qazaqstan ekonomıkasy jahandyq trendterge ilesip keledi, - dep qosty qytaılyq sarapshy.
Eske salaıyq, buǵan deıin Beıjińde Qazaqstan Parlamenti Senatynyń Tóraǵasy, Qytaı Halyqtyq saıası konsýltatıvtik keńesi Ulttyq komıtetiniń tóraǵasy Van Hýnın men Búkilqytaılyq halyq ókilderi jınalysy Turaqty komıtetiniń tóraǵasy Chjao Ledzıdiń kezdesýleri ótken bolatyn.
Sonymen qatar Parlament Senatynyń Tóraǵasy, Álemdik jáne dástúrli dinder lıderleri sezi Hatshylyǵynyń meńgerýshisi Máýlen Áshimbaev Qytaıǵa sapary aıasynda QKP OK Birikken maıdan bóliminiń meńgerýshisi Shı Taıfenmen jáne Qytaıdyń din lıderlerimen kezdesti.