Senat Tóraǵasy Qytaıdyń Qazaqstandaǵy Elshisimen kezdesti
ASTANA. KAZINFORM – Parlament Senatynyń Tóraǵasy Máýlen Áshimbaev taıaýda elimizdegi dıplomatııalyq mıssııasy bastalǵan Qytaı Halyq Respýblıkasynyń Qazaqstandaǵy Tótenshe jáne Ókiletti Elshisi Han Chýnlınmen kezdesti.
Senat Spıkeri qazirgi tańda Qazaqstan men Qytaı arasyndaǵy qarym-qatynas jan-jaqty máńgi strategııalyq seriktestiktiń buryn-sońdy bolmaǵan deńgeıine jetkenin atap ótti. Sondaı-aq Máýlen Áshimbaev elshi Han Chýnlınniń dıplomatııalyq mıssııasy ekijaqty yntymaqtastyqtyń jańa «Altyn dáýirimen» tuspa-tus kelgenine nazar aýdaryp, munyń sımvoldyq máni zor ekenin tilge tıek etti jáne aldaǵy ýaqytta kópjaqty baılanys odan ári nyǵaıa túsetinine senim bildirdi.
Suhbat barysynda qazaq-qytaı yntymaqtastyǵyn arttyrýda eki el basshylarynyń dostyq qarym-qatynasy sheshýshi ról atqaryp otyrǵany jáne sonyń arqasynda búginde mańyzdy kelisimderge qol jetkizilgeni sóz boldy.
– Elderimizdiń basshylary arasyndaǵy tyǵyz jáne senimdi dıalog strategııalyq seriktestikti nyǵaıtý jolynda aıryqsha ról atqarady. Joǵary deńgeıdegi turaqty kezdesýler men ózara saparlardyń nátıjesinde mańyzdy kelisimder jasaldy jáne birqatar perspektıvaly ekijaqty qujattarǵa qol qoıyldy. Osyndaı qarqynnyń arqasynda Qazaqstan men Qytaı arasyndaǵy qarym-qatynas damýdyń jańa «altyn dáýirine» qadam basyp otyr. Bizdiń basty mindetimiz – Memleket basshylary deńgeıinde qol jetkizilgen ýaǵdalastyqtardy tıimdi iske asyrýǵa yqpal etý, – dedi Máýlen Áshimbaev.
Kezdesýde taraptar jahandyq jáne óńirlik kún tártibindegi ózekti máseleler boıynsha Qazaqstan men Qytaıdyń ustanymdary uqsas ekenine toqtaldy. Sondaı-aq parlamentaralyq, BUU, ShYU, AÓSShK sııaqty halyqaralyq jáne óńirlik uıymdar aıasyndaǵy ózara is-qımyl sheńberinde jahandyq damý jáne jalpyǵa birdeı qaýipsizdik pen beıbitshilikti qamtamasyz etý jónindegi birlesken bastamalarǵa mán berildi.
Sonymen qatar Senat Tóraǵasy elshi Han Chýnlınge Qazaqstan Prezıdenti Qasym-Jomart Toqaevtyń bastamasymen elimizde júrgizilip jatqan reformalar jóninde aıtyp berdi. Ol óz sózinde Memleket basshysynyń óńirlerdi damytýǵa jáne ulttyq ekonomıkany ártaraptandyrýǵa arnalǵan bastamalaryna egjeı-tegjeıli toqtalyp, qolǵa alynǵan reformalardyń strategııalyq mańyzyna nazar aýdardy.
Óz kezeginde Elshi belsendi ózara is-qımyl úshin alǵys bildirip, Qazaqstanda júrgizilip jatqan qoǵamdyq-saıası jańǵyrtýlardy joǵary baǵalady. Sondaı-aq Qazaqstan men Qytaı arasyndaǵy yntymaqtastyqty odan ári nyǵaıtýǵa múddeli ekenin jetkizdi.
Senat tóraǵasy Máýlen Áshimbaev resmı saparmen Qytaıǵa barǵanyn jazǵan edik.