Senat tóraǵasy Iran prezıdentin ulyqtaý rásimine qatysty
Memleket basshysy Qasym-Jomart Toqaevtyń tapsyrmasymen Parlament Senatynyń tóraǵasy Máýlen Áshimbaev Iran prezıdenti Masýd Pezeshkıandy ulyqtaý rásimine qatysty.
Sondaı-aq Palata spıkeri Islam keńesi májilisiniń tóraǵasymen jáne Islam mádenıeti jáne baılanystary uıymynyń basshysymen kezdesti. Ekijaqty kezdesýler barysynda taraptar Qazaqstan men Iran arasyndaǵy qarym-qatynasty arttyrý jáne parlamentaralyq yntymaqtastyqty nyǵaıtý máselelerin talqylady.
Máýlen Áshimbaev Qazaqstan Prezıdenti Qasym-Jomart Toqaevtyń atynan Iran Islam Respýblıkasynyń jańadan saılanǵan prezıdenti Masýd Pezeshkıandy saılaýdaǵy jeńisimen quttyqtady. Sonymen qatar ol Qazaqstan eki el arasyndaǵy yntymaqtastyqty odan ári damytýǵa basa mán berip otyrǵanyn atap ótti.
«Sizge Qazaqstan Respýblıkasynyń Prezıdenti Qasym-Jomart Kemeluly Toqaevtyń quttyqtaýy men jyly lebizin jetkizýge ruqsat etińiz. Memleket basshysy bizdiń elderimiz arasyndaǵy ekijaqty saıası jáne ekonomıkalyq yntymaqtastyqty damytýǵa erekshe kóńil bólip otyr. Iran – Kaspıı óńirindegi kórshimiz, sondaı-aq, Taıaý jáne Ortalyq Shyǵystaǵy mańyzdy saýda seriktesterimizdiń biri. Sondyqtan Iranmen qarym-qatynasty nyǵaıtý bizdiń syrtqy saıasatymyzdaǵy basym baǵyttardyń biri bolyp qala beredi. Bul rette Qazaqstan Parlamenti óz tarapynan elderimiz arasyndaǵy baılanysty jan-jaqty nyǵaıtýǵa yqpal etedi», – dedi Máýlen Áshimbaev.
Sonymen qatar Senat tóraǵasy Iran tarapyna atalǵan eldiń delegatsııasy Shanhaı yntymaqtastyq uıymynyń Sammıtine belsendi qatysqany úshin alǵys bildirdi. Sammıttiń nátıjesinde mańyzdy 25 qujat, onyń ishinde Astana deklaratsııasy qabyldanǵany belgili.
Suhbat kezinde parlamentaralyq yntymaqtastyq máseleleri de sóz boldy. Sonyń aıasynda Qazaqstan Parlamentiniń qos Palatasynda Iranmen dostyq toptary jumys isteıtini aıtyldy. Odan bólek, Irannyń jańartylǵan Parlamentinde osyndaı top qurý ekijaqty qarym-qatynasqa oń áser etetinine de nazar aýdaryldy.
Islam keńesi májilisiniń tóraǵasy Mohammad Bager Galıbafpen kezdesýde Máýlen Áshimbaev Qazaqstan men Iran Parlamentteriniń yntymaqtastyǵyn odan ári nyǵaıtý perspektıvasyna toqtaldy. Palata Tóraǵasy zań shyǵarý salasyndaǵy ózara baılanystyń negizgi baǵyttaryn atap ótti.
«Qazaqstan Parlamenti Irannyń Islam keńesi májilisimen ózara baılanysty arttyrýǵa múddeli. Bizdiń Parlamentterimizde jumys istep kele jatqan dostyq toptary parlamentaralyq yntymaqtastyqtyń berik negizin quraıdy. Bul baǵytta ózara baılanysty praktıkalyq mazmunǵa basymdyq bere otyryp, qalyptastyrǵan mańyzdy. Sondaı-aq eki el úshin ózekti máselelerdi oń sheshýge yqpal etý jáne zań shyǵarý isinde tájirıbe almasý da aıryqsha mánge ıe», – dedi Máýlen Áshimbaev.
Budan basqa, Senat Tóraǵasy Islam mádenıeti jáne baılanystary uıymynyń prezıdenti Mohammad Mehdı Imanıpýrmen kezdesti. Onda taraptar eki halyqtyń mádenı jáne rýhanı baılanystaryn nyǵaıtý máselelerine nazar aýdardy. Bul rette jahandyq syn-qaterlerdi eńserý jolynda róli artyp kele jatqan rýhanı dıplomatııaǵa jáne osy baǵytta kúsh biriktirýdiń mańyzyna asa mán berildi.
«Bıyl qazan aıynda Álemdik jáne dástúrli dinder kóshbasshylary Sezi Hatshylyǵynyń XXII otyrysyn ótkizý josparlanyp jatyr. Onda Sezdi damytý Tujyrymdamasyn ári qaraı iske asyrý máselesi talqylanady. Odan bólek, kelesi VIII Sezdiń taqyryby men ótkizý merzimi bekitiledi. Sondaı-aq Jas dinı lıderler forýmy ótkiziledi. Atalǵan is-sharalarǵa Iran eliniń ókilderi belsendi qatysady dep úmittenemiz», – degen Máýlen Áshimbaev Iran tarapyna Álemdik jáne dástúrli dinder kóshbasshylary Seziniń bastamalaryna qoldaý tanytyp, forýmnyń qorytyndy qujattaryn ázirleýge belsendi qatysqany jáne dinaralyq kelisimniń ıdeıalary men qundylyqtaryn dáripteýge qosqan úlesi úshin alǵys bildirdi.
